OLİMPİADADA SONUNCU İDMANÇIMIZ MÜBARİZƏNİ DAVAM ETDİRİR
74 kiloqram çəki dərəcəsində yarışan Elnur Aslanov qrupda Tacikistan və Kanada güləşçiləri ilə keçirdiyi görüşləri uduzaraq sonrakı mərhələyə çıxmaq imkanını itirmişdir.
Çəkisi 96 kiloqram olan idmançıların yarışında Rüstəm Ağayev ilk iki görüşündə Qazaxıstan və Namibiya güləşçilərinə qalib gəlmişdir. Beləliklə, Azərbaycan nümayəndəsi növbəti mərhələyə çıxmışdır.
Taekvondoçuların yarışının ikinci günü 80 kq çəki dərəcəsində çıxış edən Azərbaycan idmançısı Rəşad Əhmədov üçün son dərəcə gərgin keçmişdir. O, ilk iki görüşdə Fransa, Trinidad və Tobakodan olan rəqiblərinə qalib gələrək, yarımfinalda Türkiyə idmançısı Bəhri Tanrıqulu ilə qarşılaşmışdır. Taekvondçumuz bütün görüş ərzində irəlidə olsa da, son saniyələrdə hesab bərabərləşmişdir. Lakin bizə məlum olmayan səbəblərə görə Rəşadın rəqibi qalib hesab edilmişdir. Bundan sonra Rəşad Əhmədov bürünc medal qazanmaq üçün iki görüşü udmalı idi. Ancaq taekvondoçumuz meksikalı rəqibinə qalib gəlsə də, İran idmançısı Yusif Kərəmi ilə həlledici döyüşdə 9:10 hesabı ilə məğlub olmuşdur.
Avqustun 29-da Azərbaycan komandasının sonuncu nümayəndəsi, Rüstəm Ağayev Afinada mübarizəni davam etdirəcəkdir. Güləşçimizə uğurlar arzulayırıq.
Bölmənin digər xəbərləri
