İDMAN
“Olimpiya dünyası” qəzetinin 22 yaşı tamam olur
Bakı, 27 noyabr, AZƏRTAC
Bu gün Milli Olimpiya Komitəsinin (MOK) rəsmi mətbuat orqanı olan “Olimpiya dünyası” qəzetinin 22 yaşı tamam olur.
AZƏRTAC xəbər verir ki, ilk sayı 2001-ci il noyabrın 27-də işıq üzü görən nəşr ölkə idmanının, Olimpiya Hərəkatının və Olimpiya ideallarının təbliğini özünün başlıca vəzifəsi hesab edir. Qəzet dünyada və ölkədə baş verən mühüm idman hadisələrini, atletlərin uğurlarını operativ şəkildə işıqlandırır.
Hazırda həftədə bir dəfə 4100 tirajla çap edilən “Olimpiya dünyası” qəzeti idmanın və Olimpiya Hərəkatının təbliği ilə yanaşı, ölkədaxili və beynəlxalq idman tədbirlərinin, müxtəlif layihələrin həyata keçirilməsinə xüsusi önəm verir.
MOK-un rəsmi qəzetinin fəaliyyəti dövlət tərəfindən də layiqincə qiymətləndirilib. Azərbaycan Prezidenti İlham Əliyevin Sərəncamı ilə qəzetin iki əməkdaşı “Azərbaycan Respublikasının Əməkdar jurnalisti”, üç əməkdaşı isə “Tərəqqi” medalına layiq görülüb.
Beynəlxalq mətbuatın da diqqət mərkəzində olan “Olimpiya dünyası” İspaniyada “Nüfuz və keyfiyyətə görə-Aktualidad-XXI” adlı beynəlxalq mükafata alıb. Qəzet Milli Olimpiya Komitəsinin Ədalətli Oyunlar Komissiyasının “ Ədalətli idman təbliğatçısı” nominasiyasının qalibi olub, Azərbaycan İdman Jurnalistləri Assosiasiyası (AİJA) tərəfindən dəfələrlə “İlin ən yaxşı idman nəşri” nominasiyasına namizəd göstərilib və digər önəmli uğurlara imza atıb