Ombudsman: ABŞ Dövlət Departamentinin hesabatı həqiqəti əks etdirmir
Bakı, 18 may, AZƏRTAC
Azərbaycan Respublikasının qanunvericiliyinə əsasən tutulmuş və ya həbs edilmiş şəxslərin ombudsmana ünvanlanan təklifləri, ərizələri və şikayətləri təxirə salınmadan, senzuradan keçirilmədən aidiyyəti üzrə göndərilir. Ombudsman bu məsələni hər zaman diqqətdə saxlayır və saxlanılan şəxslərin senzurasız yazışmalarını daim monitorinq edir.
AZƏRTAC xəbər verir ki, bu barədə ombudsman Səbinə Əliyeva bildirib.
ABŞ Dövlət Departamentinin növbəti illik hesabatında Azərbaycan ombudsmanının fəaliyyəti ilə bağlı vətəndaş cəmiyyəti adı altında ünvanı və adı bilinməyən QHT-lərin fikri kimi əks olunmuş məlumatların qərəzli olduğunu və həqiqəti əks etdirmədiyini deyən S.Əliyeva vurğulayıb: “Ümumilikdə isə fəaliyyət çərçivəsində hər hansı bir fərq qoymadan bütün şəxslərin ombudsmana müraciətləri araşdırılır, icraat aparılır və hər bir müraciətə vaxtında cavab verilir. Həmçinin ombudsmanın 916 Çağrı Mərkəzi şikayətlərin dərhal və effektiv araşdırılması baxımından pandemiya, eləcə də ondan sonrakı dövrdə uğurlu və işlək mexanizm olaraq fəaliyyət göstərir. Saxlanılan şəxslərin onların müdafiəçiləri və ailə üzvləri üçün müraciətləri ödənişsiz və 7/24 əlçatandır.
Bu baxımdan qeyd etməliyik ki, vəkillərin müdafiə etdikləri şəxslərlə görüşlərinə maneə yaradılması ehtimalı ilə bağlı müraciətləri bütün hallarda təmin olunub.
Ombudsman və onun Milli Preventiv Qrupunun üzvləri tərəfindən əvvəlcədən xəbərdarlıq edilmədən saxlanılan şəxslərin öz iradəsi ilə tərk edə bilmədiyi 250-dək müəssisəyə plan üzrə və plandankənar olmaqla başçəkmələr həyata keçirilir. Yüzlərlə saxlanılan şəxs fərdi qəbul olunur, eləcə də kollektiv görüşlər, maarifləndirmə tədbirləri keçirilir. Başçəkmələr saxlanılan şəxslərin özlərinin, müdafiəçilərinin və ya ailə üzvlərinin müraciətlərinə, habelə KİV-də, sosial şəbəkələrdə gedən informasiyalara ombudsmanın çevik reaksiyası əsasında həyata keçirilir.
Barələrində müvafiq məhkəmə qərarları olan və kütləvi informasiya vasitələrində məlumat yayılmış şəxslər də dəfələrlə ombudsman və onun Milli Preventiv Qrupunun üzvləri tərəfindən qəbul olunub, müraciətləri müvafiq qurumlar qarşısında qaldırılmış və təmin edilib. Həmin şəxslər göstərilən köməkliyə və hüquqlarını diqqətdə saxladığına görə ombudsmana təşəkkürlərini bildiriblər . Eləcə də vəkillər hüquqlarını müdafiə etdiyi şəxslərin hüquqlarının təmini üçün ombudsmana müraciətlərinin daim müsbət həlli ilə bağlı göstərdiyi köməyə görə minnətdarlıqlarını ifadə ediblər.
Preventiv başçəkmələr vətəndaş cəmiyyəti nümayəndələrinin də cəlb edilməsi ilə müstəqil şəkildə aparılır. Bütün bu məlumatlara dair mətbuat açıqlamaları verilir, başçəkmələrin nəticələri ombudsmanın illik məruzələrində və MPM hesabatlarında geniş təsvir olunmaqla rəsmi internet saytı üzərindən geniş ictimaiyyətə təqdim edilir.
Hətta Beynəlxalq Qızıl Xaç Komitəsinin ölkə ombudsmanına ünvanladığı müraciətlərdə adı çəkilən şəxslərin də hər biri Milli Preventiv Qrupunun üzvləri tərəfindən başçəkmə keçirdikləri müəssisələrdə qəbul edilir, müraciətləri dinlənilir, rəftar və saxlanma şəraitləri araşdırılır. Digər qurumlara münasibətdə də ombudsman əməkdaşlığın əhəmiyyətini təşviq edir.
Qeyd olunanları nəzərə alaraq, qısa şəkildə əsaslandırılmış məlumatları təqdim etməklə, ABŞ Dövlət Departamentinin hesabatında müvəkkilin fəaliyyəti ilə bağlı yer alan qeydlərin əsassız olduğunu, hər hansı bir problemin həllinə xidmət etmədiyini bildiririk”, - deyə ombudsman qeyd edib.
Bölmənin digər xəbərləri
