ELM VƏ TƏHSİL
ON SƏKKİZ TƏLƏBƏMİZ MƏRKƏZİ AVROPA UNİVERSİTETİNDƏ MAGİSTR TƏHSİLİ ALACAQDIR
ABŞ-ın ölkəmizdəki səfirliyi tərəfindən yaradılmış Bakı Təhsil Məlumat Mərkəzi bakalavr dərəcəsi olan gənclər üçün həyata keçirdiyi “Beynəlxalq magistr proqramı”nı davam etdirir.
Mərkəzdən AZƏRTAC-ın müxbirinə bildirmişlər ki, Açıq Cəmiyyət İnstitutu-Yardım Fondunun maliyyə dəstəyi ilə həyata keçirilən bu proqram əsasında 2004-2005-ci tədris ilində 18 tələbəmiz magistr pilləsi üzrə təhsil almaq məqsədi ilə Macarıstanın Budapeşt şəhərindəki Mərkəzi Avropa Universitetinə göndərilmişdir. Onlar universitetdə hüquq, tarix, iqtisadiyyat, orta əsrlər araşdırmaları, siyasi elmlər və sosiologiya sahələri üzrə bir və iki illik təhsil alacaqlar.