Ordubadda tarix-memarlıq abidəsinin bərpası üçün layihələndirmə işlərinə başlanılıb
Naxçıvan, 19 yanvar, AZƏRTAC
Ordubad şəhərində yerləşən "Sərşəhər Məscidi" tarix-memarlıq abidəsinin bərpası üçün layihələndirmə işlərinə başlanılıb.
Naxçıvan Muxtar Respublikası Mədəniyyət Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, bununla bağlı müqavilə bağlanılıb.
Müqaviləyə əsasən, “Sərşəhər Məscidi”, Sərşəhər meydanına giriş baş tağlarının bərpası və meydanın abadlaşdırılması işləri həyata keçiriləcək. Nazirlik sözügedən işlərin icrasını "Storm Building” Məhdud Məsuliyyətli Cəmiyyətinə (MMC) həvalə edib.
Qeyd edək ki, Sərşəhər məscidi XVIII əsrə aiddir. İkimərtəbəli məscidin mehrabı, ağac sütunları, şəbəkəli pəncərələri və meydanı var. 1986-cı ildə bərpa və təmir edilib, meydan kompleksi şəklinə salınıb. Məscid Nazirlər Kabinetinin 2001-ci 2 avqust tarixli qərarı ilə yerli əhəmiyyətli daşınmaz tarix və mədəniyyət abidələrinin siyahısına salınıb.
Bölmənin digər xəbərləri
