İQTİSADİYYAT
Ötən il bir mənbədən satınalma üzrə açıq tender əhəmiyyətli çəkiyə malik olub
Bakı, 25 may, AZƏRTAC
2022-ci il üzrə hesabat ilində say baxımından bir mənbədən satınalma metodu məbləğ baxımından açıq tender əhəmiyyətli çəkiyə malik olub.
AZƏRTAC Hesablama Palatasına istinadla bildirir ki, müsabiqə əsaslı satınalma metodu üzrə əvvəlki 2021-ci illə müqayisədə artım, bir mənbədən satınalma üzrə isə, əksinə, azalma müşahidə edilib. Beləliklə, ötən ildə say baxımından satınalmalar arasında bir mənbədən satınalma metodu 35,4 faiz, elektron da daxil olmaqla, açıq tender 33,6 faiz, kotirovka sorğusu 27,0 faiz, təkliflər sorğusu 4,0 faiz paya malik olub.
Məbləğ baxımından satınalmada açıq tender (elektron daxil olmaqla) ümumi məbləğdə 50,6 faiz, bir mənbədən satınalma metodu 33,6 faiz, təkliflər sorğusu 14,8 faiz, kotirovka sorğusu 1,0 faiz paya malik olub.
2022-ci illərdə keçirilmiş satınalmalar barədə hesabata əsasən, ötən il ümumilikdə, 12102 sayda satınalma həyata keçirilib və məbləğ 6779,2 milyon manat təşkil edib. Beləliklə, ötən ildə 4063 sayda açıq tender üzrə (elektron da daxil olmaqla) məbləğ 3430,6 milyon, 3271 sayda kotirovka sorğusu üzrə 67,9 milyon, 490 sayda təkliflər sorğusu üzrə 1002,2 milyon, 4278 sayda bir mənbədən satınalma üzrə isə məbləğ 2278,5 milyon manat təşkil edib.
2022-ci il ərzində satınalma metodlarının say baxımından 40,5 faizi ilin I yarısında, 59,5 faizi isə II yarısında tətbiq edilib.
Keçirilmiş satınalmaların məbləğ baxımından 2022-ci ilin rübləri üzrə dinamika belədir: dövlət satınalmalarının məbləğ ifadəsində 35,1 faizi və ya 2379,9 milyon manatı, o cümlədən açıq tender üzrə satınalmaların 28,2 faizi və ya 628,5 milyon manatı, elektron açıq tender üzrə satınalmaların 43 faizi və ya 517,5 milyon manatı, kotirovka sorğusu üzrə satınalmaların 44,1 faizi və yaxud 30 milyon manatı, təkliflər sorğusu üzrə satınalmaların 68,7 faizi və ya 689,0 milyon manatı, bir mənbədən keçirilən satınalmaların 22,6 faizi və yaxud 515 milyon manatı ilin IV rübünü əhatə edib.
Ayrı-ayrı qurumların satınalma ilə bağlı təqdim etdikləri məlumatların seçmə qaydada təhlili göstərir ki, bəzi qurumların ümumi satınalma məbləğində bir mənbədən satınalmaların payı daha çox olub.
Cəmi satınalma məbləğində bir mənbədən satınalmanın payında əhəmiyyətli olduğu (65%-dən çox) 9 qurum qeydə alınıb. Bunlardan Audiovizual Şuranın xüsusi çəkisi 68,5 faiz, Mədəniyyət Nazirliyi 78,8 faiz, Akademik Ə.Quliyev adına Aşqarlar Kimyası İnstitutu 87,5 faiz, Bərpa Olunan Enerji Mənbələri Dövlət Agentliyi 81,8 faiz, Kənd Təsərrüfatı Nazirliyi 75,7 faiz, Kənd Təsərrüfatı Nazirliyinin Aqrar Tədqiqatlar Mərkəzi 74,5 faiz, Aqrar Sığorta Fondu 84,6 faiz, Kosmik Agentlik 75,8 faiz və İqtisadiyyat Nazirliyi yanında Əmlak Məsələləri Dövlət Xidməti 95,8 faiz təşkil edib.