Ötən il müdafiə təyinatlı məmulatların istehsalı 1,8 dəfə artıb
Bakı, 24 yanvar, AZƏRTAC
Müdafiə Sənayesi Nazirliyində (MSN) 2016-cı ilin yekunlarına həsr olunan kollegiya iclası keçirilib.
MSN-dən AZƏRTAC-a bildiriblər ki, iclasda nazirliyin birlik və müəssisələrinin istehsal, maliyyə-təsərrüfat fəaliyyətlərinin yekunları və qarşıda duran məsələlər geniş müzakirə edilib.
Müdafiə sənayesi naziri Yavər Camalov bildirib ki, ötən il MSN-in müəssisələrində müvafiq proqramlar əsasında bir sıra yeni növ müdafiə və mülki təyinatlı məmulatların yaradılması və istehsalının mənimsənilməsi istiqamətində intensiv işlər görülüb. Hesabat dövründə nəzərdə tutulan tədbirlərin icrası davam etdirilib, respublikanın güc strukturlarının sifarişləri üzrə bağlanmış müqavilələr əsasında müdafiə təyinatlı məmulatlar istehsal edilərək sifarişçilərə təhvil verilib. Eyni zamanda, mülki məmulatların istehsalının genişləndirilməsi üzrə işlər davam etdirilib. Ötən il nazirliyin müəssisələrində istehsal olunan məhsulların ümumi həcminin 86 faizini müdafiə və xüsusi təyinatlı, 14 faizini isə mülki təyinatlı məhsullar təşkil edib. 2015-ci illə müqayisədə müdafiə təyinatlı məmulatların istehsalında 1,8 dəfə artım əldə olunub.
Diqqətə çatdırılıb ki, hesabat ilində sifarişçilərə pilotsuz uçuş aparatları, minaatanlar, “AK-74M” tipli avtomat, universal pulemyot, xüsusi təyinatlı snayper tüfəngi, “Matador” və “Marauder” tipli zirehli transportyorlar, avtomatik qumbaraatan kompleksi, zenit qurğusu üçün nişangah, müxtəlif çaplı patronlar, atəş yığımları, tank əleyhinə əl qumbaraatanı üçün qumbara, təlim aviasiya bombaları və s. məmulatlar təhvil verilib. Ötən ilin yaradılma proqramına əsasən, nazirliyin müəssisələri tərəfindən daxili imkanlar hesabına 4 məmulat, 53 mərhələ üzrə təcrübi-konstruktor işləri başa çatdırılıb və silahlanmaya tövsiyə olunub.
Bildirilib ki, ötən il MSN-in Elmi-Tədqiqat İnstitutu tərəfindən dövlət sifarişi xətti ilə 30 mövzu üzrə elmi-tədqiqat və təcrübi konstruktor işləri aparılıb. Eyni zamanda, Milli Aerokosmik Agentliyi (MAKA) tərəfindən Silahlı Qüvvələrin sifarişləri əsasında müxtəlif sahələri əhatə edən 33 mövzu üzrə elmi-tədqiqat işləri davam etdirilib. Nazirlikdə fəaliyyət göstərən Elmi-Texniki Şuranın müvafiq bölmələrinin altı iclası keçirilib, iş planına daxil edilmiş müxtəlif mövzular üzrə müzakirələr aparılıb, konkret təklif və rəylər qəbul edilib.
Hesabat dövründə nazirliyin qarşısında qoyulan tapşırıqların vaxtında təmin edilməsi üçün dünyanın inkişaf etmiş dövlətlərinin hərbi sənaye kompleksinə daxil olan şirkət və qurumlarla hərbi-texniki sahədə əməkdaşlıq davam etdirilib. 2016-cı ildə nazirliyin və tabeli birlik, müəssisələrin rəhbər işçiləri tərəfindən dünyanın 20-dən çox dövlətinin aidiyyəti qurumları ilə əlaqələr qurulub, əməkdaşlığın müxtəlif istiqamətləri üzrə danışıqlar aparılıb.
Kollegiyada qeyd olunub ki, 2009-cu ildən beynəlxalq sərgilərə qatılan MSN “ADEX-2014” sərgisi kimi “ADEX-2016” ikinci Azərbaycan Beynəlxalq müdafiə sərgisini də yüksək səviyyədə təşkil edib. Dünyanın 44 ölkəsindən 250-yə yaxın şirkət və rəsmi heyətin iştirak etdiyi “ADEX-2016” sərgisində ekspozisiya meydançasının min kvadratmetrlik sahəsini əhatə edən milli pavilyonda Azərbaycan müdafiə sənayesinin yenilikləri nümayiş etdirilib. İlk qatıldığı beynəlxalq sərgidə 27 adda müdafiə təyinatlı məmulatla təmsil olunan MSN “ADEX-2016” sərgisində 260 adda məmulat nümayiş etdirib. Sərgidə ilk dəfə nümayiş etdirilən məmulatlardan mina əleyhinə “İldırım” və “Qasırğa” zirehli maşınları, “AZAD sistemlər” müəssisəsi tərəfindən hazırlanan pilotsuz uçuş aparatlarının ən yeni tipli təkmilləşdirilmiş variantları, yeni növ atıcı silahlar, tank əleyhinə idarə olunan raketlə təchiz edilmiş “Gürzə” nəzarət patrul maşını, döyüş sursatları və onların partladıcı başlıqları sərgini ziyarət edənlər tərəfindən böyük maraqla qarşılanıb. Sərgi çərçivəsində hərbi-texniki əməkdaşlığın müxtəlif istiqamətləri üzrə danışıqlar aparılıb və bir sıra yeni layihələrin reallaşdırılması məsələləri müzakirə olunub. Həmçinin MSN ilə Müdafiə Nazirliyi arasında yeni növ kamikadze tipli “Zərbə” və kəşfiyyat-müşahidə xarakterli pilotsuz uçuş aparatlarının istehsal edilib Silahlı Qüvvələrin istifadəsinə verilməsinə dair memorandum imzalanıb.
İclasda birlik və müəssisə rəhbərlərinin hesabatları dinlənilib.
Nazir hesabat dövründə tabeli birlik və müəssisələr tərəfindən görülmüş işləri müsbət qiymətləndirib. Yavər Camalov ölkəmizin müdafiə sənayesinin inkişafının Prezident İlham Əliyevin daim diqqətində olduğunu və sahə ilə bağlı dövlətimizin başçısı tərəfindən verilən tapşırıqların yerinə yetirilməsi istiqamətində struktur bölmə, birlik və müəssisə rəhbərlərinə göstərişlər verib.
Bölmənin digər xəbərləri
