ÖTƏN İL QAÇQINLARA VƏ MƏCBURİ KÖÇKÜNLƏRƏ 82 MİLYON DOLLAR VƏSAİT XƏRCLƏNMİŞDİR
Komitənin mətbuat xidmətindən AZƏRTAC-a bildirmişlər ki, bu rəqəmlər Azərbaycan hökumətinin təqdim etdiyi hesabata uyğundur. Eyni zamanda, 2005-ci ildə 140 mindən artıq məcburi köçkünə hər ay 6,4 milyon manatlıq (7 milyon dollar) ərzaq məhsulu - un, şəkər tozu, düyü, bitki yağı verilmiş, 25,4 milyon manat (27,7 milyon dollar) il ərzində istifadə edilmiş kommunal xidmətlərə görə müvafiq xidmətləri göstərən idarə və müəssisələrin hesabına köçürülmüş, 2,4 milyon manat (2,6 milyon dollar) vəsait payız-qış mövsümündə 87,1 min ailənin ağ neft yanacağı ilə təmin edilməsinə, 3,1 milyon manat (3,4 milyon ABŞ dolları) müxtəlif sosial problemlərin həllinə sərf olunmuşdur. Bütün vəsait dövlət xəzinədarlığı vasitəsilə, mərkəzləşdirilmiş qaydada köçürülmüşdür.
Təəssüf ki, “Azadlıq” qəzetinin 14 mart, “Bakı xəbər” qəzetinin isə 15 mart 2006-cı il tarixli nömrələrində ABŞ Dövlət Departamentinin adıçəkilən hesabatının qaçqın və məcburi köçkünlərə aid hissəsi təhrif olunmuşdur.
