Ötən il Türkiyədə qızıl istehsalı rekord həddə çatıb
İstanbul, 7 yanvar, AZƏRTAC
Keçən il Türkiyədə qızıl istehsalı COVID-19 epidemiyasına baxmayaraq, respublika tarixində rekord həddə çataraq 42 ton təşkil edib.
AZƏRTAC xəbər verir ki, bu barədə Türkiyənin enerji və təbii sərvətlər naziri Fatih Dönməz deyib.
Türkiyənin 2001-ci ildə 1,4 tonla qızıl istehsalına başladığını bildirən nazir ötən 20 il ərzində ölkədə ümumilikdə 382 ton qızıl çıxarıldığını, bununla da dövlət büdcəsinə 76 ton qızıla bərabər vergi gəliri qazandırıldığını bildirib.
Qeyd edib ki, Türkiyə ərazisində yerli və xarici sərmayədarlara məxsus olmaqla ümumilikdə 18 qızıl yatağı fəaliyyət göstərir. 20 yeni yataq layihəsi də investisa üçün hazırlanır. Bu layihələrin fəaliyyətə keçməsi ilə ölkədə qızıl istehsalının illik 100 tona çıxarılması planlaşdırılır.
2020-ci ilin əvvəlindən qızıl istehsalında illik hədəfin 40-45 ton arasında olduğunu deyən F.Dönməz pandemiyaya baxmayaraq, ilin sonunda bu rəqəmin respublika tarixində rekord həddə çataraq 42 ton təşkil etdiyini, bununla da dövlət büdcəsinin 2,4 milyard dollar gəlir əldə etdiyini vurğulayıb.
Qeyd olunub ki, Türkiyədə bu günə qədər qızıl yataqlarına ümumilikdə 6 milyard dollar investisiya qoyulub.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
