ÖZBƏKİSTAN PREZİDENTİ TƏKZİB EDİR

02.08.2004 [16:23]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, Özbəkistan Prezidenti İslam Kərimov Daşkənddə qanlı terror hərəkətlərini “Özbəkistanın islam hərəkatı” qruplaşmasının törətdiyi barədə verilən xəbərləri təkzib etmişdir. İslam Kərimov əmindir ki, “Özbəkistanın islam hərəkatı”, əslində, daha mövcud deyil və paytaxtda iyulun 30-da törədilən terror aktlarında onun əli ola bilməz.

Dövlət başçısı bir gün əvvəl televiziya ilə çıxışında rəsmən bəyan etmişdir ki, “Özbəkistan paytaxtındakı qanlı terror aktlarının arxasında “Hizb ut-təhrir” (“Azadlıq Partiyası”) ekstremist təşkilatı durur”.

Respublikanın Ali Məhkəməsində artıq bir həftədən çoxdur ki, 15 terrorçunun mühakiməsi gedir. Onlar cinayət məcəlləsinin 17 maddəsi üzrə müxtəlif cinayətlərdə, o cümlədən mövcud konstitusiyalı quruluşu zorakılıqla devirmək cəhdlərində təqsirləndirilir.

Prezident İ.Kərimov bu barədə danışaraq bildirmişdir ki, 15 müttəhim arasında “Hizb ut-təhrir”in fəal üzvləri də var.