Özbəkistanda hər il oktyabrın ilk həftəsi “Ahıllar həftəsi” kimi qeyd olunacaq
Daşkənd, 2 oktyabr, АZƏRTAC
Bu ildən etibarən hər il oktyabrın ilk həftəsi Özbəkistanda “Ahıllar həftəsi” kimi qeyd ediləcək.
AZƏRTAC xəbər verir ki, Özbəkistan hökumətinin “Yaşlı nəslin nümayəndələrinin cəmiyyətdəki rolunun və sosial fəallığının artırılması üzrə tədbirlər planı haqqında” qərarına əsasən, ölkədə “Ahılların məsləhətxanaları” adlı qruplar da fəaliyyət göstərəcək. Bu qruplar yaşlı adamların ünvanlarını müəyyənləşdirəcək, onların problemlərinin həlli ilə məşğul olacaq.
Nazirliklərdə, idarələrdə, təsərrüfat birliklərində rəhbərlərin müavinlərindən biri ictimai əsaslarla “Veteranlar Şurası”nın fəaliyyətinə nəzarət edəcək. Veteranlar təqaüdə çıxarkən xüsusi tədbir keçiriləcək və onlara mükafatlar veriləcək.
Həmçinin “Özbəkistana səyahət” proqramı çərçivəsində ahıl adamlar üçün respublikanın tarixi şəhərləri və ziyarətgahlarına səyahətlər təşkil olunacaq.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
