Özbəkistanın uchildiz.uz portalında mart soyqırımı ilə əlaqədar məqalə yerləşdirilib
Daşkənd, 1 aprel, AZƏRTAC
Azərbaycanın Özbəkistandakı səfirliyi və bu qurumun nəzdindəki Heydər Əliyev adına Azərbaycan Mədəniyyət Mərkəzinin təşəbbüsü ilə Daşkənddəki uchildiz.uz portalı 31 mart - Azərbaycanlıların Soyqırımı Günü ilə əlaqədar özbək və rus dillərində geniş məqalə yayımlayıb.
Materialda 1998-ci il martın 26-da ulu öndər Heydər Əliyev tərəfindən “Azərbaycanlıların soyqırımı haqqında” Fərmanın imzalanması və bundan sonra hər il martın 31-nin Azərbaycanlıların Soyqırımı Günü kimi dövlət səviyyəsində qeyd olunması oxucuların diqqətinə çatdırılır. Qeyd edilir ki, məhz həmin sənədin imzalanmasından sonra bu sahədə köklü işlər görülüb, Azərbaycan, rus, ingilis dillərində onlarca kitab və buklet çap edilib.
Yazıda deyilir ki, Azərbaycan Prezidenti İlham Əliyevin Sərəncamı ilə Quba şəhərində aşkar olunan kütləvi məzarlıqda Soyqırımı Memorial Kompleksi yaradılıb.
Məqalədə 1905-1907-ci illərin qanlı hadisələri, 1918-1920-ci illərdə həyata keçirilən soyqırımlar, Quba qəzasındakı qətliam, Xocalı faciəsi haqqında məlumatlar da yer alıb. Qeyd olunur ki, erməni daşnakları 1905-1907-ci illərdə Bakıda, Zəngəzurda, İrəvanda, Naxçıvanda, Ordubadda, Qazaxda və digər ərazilərimizdə azərbaycanlılara qarşı kütləvi qırğınlar və talanlar törədib, on minlərlə günahsız insanı doğma yurd-yuvalarından didərgin salıb.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
