İDMAN
ÖZBƏKLƏR ANTARKTİDANI FƏTH ETMƏYƏ GEDİRLƏR
AZƏRTAC-ın müxbiri Daşkənddən xəbər verir ki, Özbəkistanın ilk Antarktida ekspedisiyası cənub qütbündə iki zirvəni fəth etməyə hazırlaşır.
Ekspedisiyanın təşkilat komitəsinin mətbuat üçün məlumatında deyilir ki, beynəlxalq Antarktida ekspedisiyasının üzvləri əvvəlcə 4 min metrdən hündür olan və indiyədək fəth edilməmiş adsız zirvəyə qalxacaqlar. Bu cəhd uğurlu olsa, zirvəyə “Özbəkistan” adı veriləcəkdir. Sonra ekspedisiyanın üzvləri Antarktidanın “Vinson” adlanan ən uca zirvəsinə qalxacaqlar.
Layihədə elmi tədqiqatlar – müasir elm üçün böyük əhəmiyyətə malik Antarktida meteoritlərinin axtarışı da nəzərdə tutulur. Bundan ötrü ekspedisiya meteorit metallara həssas olan xüsusi maqnitometrik texnika ilə təchiz ediləcəkdir.
Özbəkistanın Xarici İşlər Nazirliyi ekspedisiyaya dövlət statusu verildiyini bildirmişdir.