Pakistan-Azərbaycan əlaqələri qardaşlıq münasibətlərinin əsl nümunəsidir ŞƏRH
Bakı, 13 yanvar, AZƏRTAC
Pakistan və Azərbaycan arasında əlaqələrin möhkəmləndirilməsi müasir dövrdə xüsusi əhəmiyyət daşıyır. Qlobal ittifaqların dəyişdiyi bir zamanda qarşılıqlı hörmət, ortaq dəyərlər və səmimi yoldaşlıq əsasında qurulan münasibətlər zamanın sınağından uğurla keçir. Bu münasibətlər içərisində Pakistan və Azərbaycan arasındakı əlaqələr qardaşlıq münasibətlərinin əsl nümunəsidir. Tarixi, mədəni və ortaq arzulara əsaslanan bu əlaqə Prezident İlham Əliyevin uzaqgörən liderliyi ilə daha da möhkəmlənib. Prezident İlham Əliyevin son müsahibəsi Azərbaycanın nailiyyətlərini, ambisiyalarını və gələcəkdə bu unikal tərəfdaşlığı daha da inkişaf etdirmək üçün Pakistan üçün əhəmiyyətli dərsləri əks etdirir.
Bu sözləri AZƏRTAC-a açıqlamasında Pakistan Gənclər Hərəkatının lideri (QHT forumu) Qeysər Nəvvab söyləyib.
O bildirib ki, Prezident İlham Əliyev Azərbaycanı tərəqqi yolunda güclü irəliləyiş əldə edən bir ölkəyə çevirməkdə böyük rol oynayıb. Onun rəhbərliyi əməkdaşlıq təşəbbüslərini gücləndirmək və etimada əsaslanan münasibətlər qurmaq öhdəliyinə söykənir. İllər ərzində Azərbaycan Pakistana ardıcıl və davamlı dəstək göstərib. Pakistan da öz növbəsində Azərbaycanın ərazi bütövlüyünü tanıyaraq Qarabağ münaqişəsində onun haqlı mövqeyini dəstəkləyib. Bu qarşılıqlı dəstək sadəcə diplomatik jest deyil, prinsiplərə və ortaq dəyərlərə əsaslanan dərin bağların göstəricisidir.
Qeysər Nəvvab qeyd edib ki, Prezident İlham Əliyevin müsahibəsində Azərbaycanın iqtisadiyyatını şaxələndirmək və səmərəli tərəfdaşlıqlar yaratmaq istiqamətində atdığı addımlar geniş şəkildə vurğulanır. Bu strategiya Pakistanın iqtisadi dirçəlişə və enerji sahəsində etibarlı tərəfdaşlar tapmağa yönəlmiş məqsədləri ilə üst-üstə düşür. İki ölkə arasında enerji sahəsində əməkdaşlıq üçün böyük potensial mövcuddur. Zəngin neft və qaz ehtiyatlarına malik olan Azərbaycan regional enerji mərkəzi kimi mühüm rol oynayır. Cənub Qaz Dəhlizi layihəsi regional enerji əlaqələrinin modelidir və Pakistana enerji təchizatında kömək edə bilər. Bundan əlavə, ticarət və logistika sahəsində əməkdaşlıq üçün də geniş imkanlar var. Azərbaycanın Avropa və Asiya arasında strateji mövqeyi Pakistan-Çin iqtisadi dəhlizi layihəsi çərçivəsində Pakistanın hədəflərinə uyğundur. Birlikdə hər iki ölkə güclü ticarət şəbəkələri quraraq regional əlaqələri genişləndirə və iqtisadi imkanlar aça bilər.
Pakistan və Azərbaycan arasındakı əlaqələrin mərkəzində mədəni və təhsil mübadiləsinin dayandığını deyən Pakistan Gənclər Hərəkatının lideri deyib: “Hər iki ölkənin zəngin tarixi və mədəni irsi əməkdaşlıq üçün çoxsaylı imkanlar yaradır. Prezident İlham Əliyevin mədəni irsin qorunmasına və təhsilə verdiyi önəm xalqları bir-birinə yaxınlaşdırmaq üçün mühüm vasitədir. Birgə festivallar, sərgilər və incəsənət mübadiləsi kimi mədəni diplomatiya iki ölkə arasındakı oxşarlıqları vurğulaya və daha dərin bağlar yarada bilər. Həmçinin ortaq dini dəyərlər bu əlaqələri daha da möhkəmləndirir. İslam kimliyini vurğulayan hər iki ölkə tolerantlıq və dinc yanaşı yaşama prinsiplərini təbliğ edir. Təhsil sahəsində əməkdaşlıq da münasibətlərin güclənməsinə töhfə verir. Azərbaycan universitetləri tədqiqat və innovasiya sahələrində əhəmiyyətli uğurlar əldə edərək Pakistan tələbələri üçün geniş akademik imkanlar təqdim edir. Bu mübadilə proqramları yalnız təhsil tərəqqisi ilə məhdudlaşmır, həm də iki ölkənin gəncləri arasında dostluq və qarşılıqlı anlaşma münasibətlərini inkişaf etdirir”.
Onun sözlərinə görə, Prezident İlham Əliyevin rəhbərliyi ilə Azərbaycan müasir infrastrukturun qurulması, iqtisadiyyatın şaxələndirilməsi və bərpaolunan enerji və texnologiyaya investisiya kimi sahələrdə əhəmiyyətli irəliləyişlərə nail olub. Bu uğurlar Pakistan üçün dəyərli dərslər təqdim edir və öz inkişaf məqsədlərini həyata keçirməkdə ona ilham mənbəyi olur. İki ölkə arasında əməkdaşlığın perspektivləri genişdir. Enerji və ticarətin şaxələndirilməsi sahəsində əməkdaşlıq nəzərəçarpacaq dərəcədə inkişaf edə bilər. Bundan əlavə, turizm, kənd təsərrüfatı və texnologiya sahələrində də tərəfdaşlıq imkanları araşdırıla bilər. Məsələn, birbaşa hava əlaqələrinin yaradılması hər iki ölkə arasında ticarət, turizm və mədəni mübadilələri əhəmiyyətli dərəcədə artırar. Bərpaolunan enerji, süni intellekt və infrastruktur sahələrində birgə investisiyaların cəlb edilməsi, Pakistan və Azərbaycan arasında iqtisadi əməkdaşlığı daha da dərinləşdirə bilər. Həmçinin bu sahələrdə tərəfdaşlıq, hər iki ölkənin dayanıqlı inkişaf məqsədlərinə çatmasına kömək edər. İki ölkə, həmçinin qlobal miqyasda iqlim dəyişikliyi, terrorizm və iqtisadi bərabərsizlik kimi ümumi çağırışlara qarşı mübarizə aparmaq üçün birlikdə əməkdaşlıq edə bilər.
“Azərbaycanın və Pakistanın beynəlxalq arenada güclü mövqeyə sahib olmaları, onların qlobal məsələlərə yanaşmalarında eyni prinsipləri əsas almasına imkan verir. Bu yanaşmalar, hər iki ölkənin dünya üzrə siyasi təsirini artırar və qlobal tərəfdaşlıqların qurulmasına şərait yaradar. Pakistan və Azərbaycan arasındakı münasibətlərin gələcəkdə daha da möhkəmlənməsi, regional və qlobal miqyasda qarşılıqlı fayda gətirəcək və hər iki xalqın rifahını yüksəldəcək”, - deyə Q.Nəvvab əlavə edib.
Bölmənin digər xəbərləri
