PAKİSTAN KABİLDƏKİ SƏFİRLİYİNDƏ TƏHLÜKƏSİZLİK TƏDBİRLƏRİNİ GÜCLƏNDİRİR
XİN-in məlumatına görə, bu tədbirlər səfirliyin həndəvərində Pakistan əleyhinə nümayişlər və etiraz mitinqləri keçiriləcəyi barədə xəbərlərlə əlaqədar görülür.
Sovet qoşunları ilə müharibə dövründə mücahidlərin ən məşhur liderlərindən biri, 1992-ci ildə sovetpərəst rejim devrildikdən sonra ölkənin ilk prezidenti, indi isə Əfqanıstan Senatının başçısı və barışıq komissiyasının sədri Sibğətullah Mücəddədi keçən bazar günü basqına məruz qalmışdır: iki terrorçu intiharçı onun avtomobili yaxınlıqdan keçərkən özlərini partlatmışlar. Terror aktı nəticəsində Mücəddədinin özü xəsarət almasa da, beş adam həlak olmuşdur. Bu terakta görə məsuliyyəti “Taliban” hərəkatı öz üzərinə götürmüşdür. Lakin Mücəddədi bildirmişdir ki, ona qəsdin arxasında Pakistan durur. İslamabad bu bəyanatı rədd edərək, onu “cəfəngiyat” adlandırmışdır.
Rəsmi Kabil “Taliban” hərəkatı yaraqlılarının Pakistan ərazisində sığınacaq tapdıqları və oradan Əfqanıstana daim basqınlar törətdikləri, Pakistanın təhlükəsizlik qüvvələrinin isə, onların tutulması üçün lazımınca səylər göstərmədikləri barədə bir sıra bəyanatlar verməsindən sonra iki ölkə arasında münasibətlər yenidən pisləşmişdir.
Bölmənin digər xəbərləri
