İslamabad, 2 aprel (AZƏRTAC). Pakistanın “The Frontier Post” qəzetində bu ölkənin Milli Müdafiə Universitetinin aparıcı tədqiqatçısı İffət Pərvizin “Azərbaycanda soyqırımı” adlı məqaləsi dərc edilmişdir.

Məqalədə bildirilir ki, 1998-ci il martın 26-da Azərbaycan Prezidenti Heydər Əliyev imzaladığı Fərmanla 31 martı Azərbaycanlıların Soyqırımı Günü elan etmişdir.

Müəllif Fərmana istinadən yazır: “Birinci dünya müharibəsi, Rusiyada baş vermiş 1917-ci il fevral və oktyabr çevrilişlərindən məharətlə istifadə edən ermənilər öz iddialarını bolşevik bayrağı altında reallaşdırmağa nail oldular. 1918-ci ilin mart ayından etibarən əks-inqilabçı ünsürlərlə mübarizə şüarı altında Bakı Kommunası tərəfindən ümumən Bakı quberniyasını azərbaycanlılardan təmizləmək məqsədi güdən mənfur plan həyata keçirilməyə başlandı. Həmin günlərdə ermənilərin törətdikləri cinayətlər Azərbaycan xalqının yaddaşına əbədi həkk olunmuşdur”.

Məqalədə diqqətə çatdırılır ki, Azərbaycan xalqı hər il martın 31-də ermənilərin soyqırımı və etnik təmizləmə siyasətinin qurbanlarını yad edir.

Müəllif Azərbaycan tarixinə nəzər salaraq Gülüstan və Türkmənçay müqavilələrindən bəhs edir. Qeyd edilir ki, bu sazişlər nəticəsində Azərbaycan parçalanmış, ölkənin tarixi əraziləri olan Dağlıq Qarabağ, Naxçıvan, Zəngəzur, Dərələyəz, Ordubad, Vedibasar və digər yerlərə İran və Türkiyədən ermənilər köçürülmüşdür. Lakin bütün bunlara baxmayaraq, azərbaycanlılar yenə də bu ərazilərdə çoxluq təşkil etmiş və məhz bu səbəbdən “Böyük Ermənistan” xülyası ilə yaşayan ermənilər azərbaycanlılara qarşı soyqırımı siyasətini tətbiq etmişlər. Azərbaycan torpaqlarının işğalı da bu siyasətin ayrılmaz tərkib hissəsi olmuşdur.

Müəllif oxucuların diqqətinə çatdırır ki, ki, 1905-1907-ci illərdə minlərlə günahsız azərbaycanlı ermənilər tərəfindən öldürülmüşdür. Birinci Dünya müharibəsindən sonra Rusiya bolşeviklərinin başçısı V.Lenin S.Şaumyanı Qafqazın fövqəladə komissarı təyin edərək onu Bakıya göndərmişdir. Bakıda hakimiyyəti ələ keçirən bolşeviklər azərbaycanlıları tamamilə məhv etmək üçün ermənilərə şərait yaratmışlar. Mart ayının 3-də Bakı Sovetinin 6, daşnakların isə 4 min əsgəri azərbaycanlılara qarşı soyqırımı əməliyyatına başlamışlar. Qısa müddət ərzində Bakının əksər hissəsi dağıdılmış, Şamaxı, Quba, Qarabağ, Zəngəzur, Naxçıvan, Lənkəran və Azərbaycanın digər bölgələrində də kütləvi qırğınlar törədilmişdir.

Məqalədə qeyd edilir ki, 1919-cu ildə keçirilmiş Paris Sülh Konfransında iştirak etmiş Azərbaycan nümayəndə heyəti ermənilərin Bakı hadisələrində əsas rol oynadıqlarını, minlərlə uşaq, qadın və qocanı öldürdüklərini bildirmişlər.

Müəllif yazır ki, ermənilər azərbaycanlılara qarşı soyqırımı siyasətini davam etdirərək 1992-ci il fevralın 26-da Xocalı şəhərində yüzlərlə günahsız insanı xüsusi amansızlıqla qətlə yetirmişlər.

Qulu Kəngərli

AZƏRTAC-ın xüsusi müxbiri

İslamabad