“PALİTRA”NIN BEŞ YAŞI TAMAM OLMUŞDUR
AZƏRTAC xəbər verir ki, “Palitra” ictimai-siyasi qəzetinin beş yaşı tamam olmuşdur. Azərbaycanda kifayət qədər qəzet bolluğu mühitində həyata vəsiqə alan “Palitra” az vaxtda özünə geniş oxucu auditoriyası qazanmışdır. Ölkəmizdə və xaricdə baş verən ən mühüm hadisələr “Palitra”nın səhifələrində obyektiv və operativ yer alır, cəmiyyət həyatının müxtəlif sahələri geniş işıqlandırılır. Azərbaycan həqiqətlərini dünyaya çatdırmaq, dövlətçiliyimizi inkişaf etdirmək, vətəndaş cəmiyyətinin qurulmasına, demokratik dəyərlərin tərəqqisinə önəm verən palitraçılar hər yeni nömrələri ilə həftədə 3 gün oxucularının qonağı olur, onların arzu, istək və təkliflərini nəzərə almağa çalışırlar.
Əlbəttə, tarix baxımından beş il heç də böyük zaman kəsiyi deyildir. Ancaq qəzetin əməkdaşları müstəqil Azərbaycanın inkişafına xidmət göstərməklə daha samballı yubileylərini qeyd etmək arzusu ilə çalışırlar.
