Papuaşvili: Gürcüstan hökumətinin qəbul etdiyi bütün qərarlar milli maraqlara və geosiyasi reallıqlara əsaslanıb
Tbilisi, 1 fevral, AZƏRTAC
Gürcüstan hökuməti dünyada və regionda sülhün və sabitliyin bərqərar olmasına çalışıb. Hökumətimizin 2022-ci il fevralın 1-də Ukraynadakı eskalasiya ilə bağlı qərarı da bu məqsədə xidmət edib.
AZƏRTAC xəbər verir ki, bu sözləri Gürcüstan parlamentinin sədri Şalva Papuaşvili söyləyib.
Onun sözlərinə görə, ümumiyyətlə Gürcüstan hökumətinin qəbul etdiyi bütün qərarlar ölkənin milli maraqlarına və geosiyasi reallıqların düzgün qiymətləndirilməsinə əsaslanıb.
Ukraynada mümkün hərbi eskalasiya ilə bağlı Gürcüstan parlamentinin 2022-ci il fevralın 1-də qəbul edilən parlament qətnaməsi barədə fikirlərini də bölüşən Papuaşvili deyib: “Qətnamənin əsas məqsədi Ukraynanın suverenliyinə dəstək ifadə etmək və bölgədə müharibənin qarşısını almağa çağırış olub”.
Onun sözlərinə görə, həmin vaxt radikal müxalifət bu qətnaməyə səs verməkdən imtina edib.
“Müharibədən bir ay öncə qəbul etdiyimiz qətnamənin mahiyyəti Ukraynanın suverenliyinə hörmət, həmrəylik nümayişi və ən əsası müharibənin baş verməməsinə çağırış idi. Lakin müxalifət qətnamənin Rusiyaya qarşı kifayət qədər sərt olmadığını iddia edərək ona dəstək vermədi”, - deyə Papuaşvili vurğulayıb.
AZƏRTAC-ın xüsusi müxbiri
Tbilisi
Bölmənin digər xəbərləri
