Parisdə 20 Yanvar şəhidlərinin xatirəsi anılmışdır
Paris, 20 yanvar (AZƏRTAC). Azərbaycan xalqının azadlıq salnaməsində əbədi iz buraxan 20 Yanvar şəhidlərinin xatirəsi ölkəmizdə və dünyanın müxtəlif guşələrində olduğu kimi, Parisdə də anılmışdır.
Qanlı Yanvar faciəsi ilə bağlı keçirilən tədbirdən əvvəl Parisin Sən Klu qəbiristanlığında uyuyan Azərbaycan Demokratik Cümhuriyyətinin ilk parlamentinin sədri Əlimərdan bəy Topçubaşovun və “Azərbaycan” qəzetinin redaktoru Ceyhun Hacıbəylinin məzarları önünə Azərbaycan səfirliyi adından əklillər qoyulmuş və xatirələri bir dəqiqəlik sükutla yad edilmişdir.
Tədbirdə çıxış edən səfir Elçin Əmirbəyov çıxışında Əlimərdan bəy Topçubaşovun məzarı qarşısında 20 Yanvar şəhidlərinin xatirəsinin anılmasının heç də təsadüf olmadığını demişdir. Şərqdə ilk demokratik quruluşlu Azərbaycan Xalq Cümhuriyyətinin banilərindən biri, ilk parlamentin sədri Əlimərdan bəy Topçubaşovun və digərlərinin o dövrdə Azərbaycanın müstəqillik əldə etməsi arzusu ilə yaşadıqlarını və bu yolda yorulmadan mübarizə apardıqlarını xatırlatmışdır.
İstiqlal yolunun çətinliyini, AXC-nin 23 ay yaşadığını və bolşeviklərin Azərbaycanı zəbt etmələri nəticəsində qanlar bahasına əldə edilən müstəqilliyə son qoyulduğunu diqqətə çatdıran səfir yalnız 70 ildən sonra ölkəmizin müstəqilliyinin bərpa edildiyini bildirmişdir.
E.Əmirbəyov keçmiş sovet məkanında Azərbaycanın nadir respublikalardan biri kimi müstəqilliyini qanı bahasına yenidən əldə etdiyini vurğulayaraq qeyd etmişdir ki, xalqımız əzmkarlığını itirməmiş, illər boyu müstəqillik arzusu ilə yaşamışdır.
Səfir qeyd etmişdir ki, 20 Yanvar faciəsi Azərbaycan xalqının öz müstəqilliyindən heç zaman geri çəkilməməsinin bariz nümunəsidir. Bir tərəfdən 20 Yanvar faciəli hadisədirsə, digər tərəfdən bu, xalqımızın qəhrəmanlıq səhifəsidir. Azərbaycanın azadlığı naminə həyatlarını qurban verərək şəhidlik zirvəsinə yüksələn insanlar əmin idilər ki, ölkəmiz öz müstəqilliyini bərpa edəcəkdir. Qanlı 20 Yanvardan 24 il keçəndən sonra Azərbaycan nəinki öz müstəqilliyini qoruyub saxlaya bilmiş, hətta qüdrətli bir dövlət olmuşdur.
Azərbaycan tarixinin qanlı səhifələrindən birini təşkil edən 20 Yanvar hadisəsinə beynəlxalq aləmdə birmənalı qiymət verilməməsini xatırladan səfir ölkəmizə qarşı ikili standartlara yol verildiyini, müdhiş hadisə zamanı ümummilli liderimiz Heydər Əliyevin çətinliklərə və təhlükələrə baxmayaraq, Azərbaycanın Moskvadakı nümayəndəliyinə gələrək faciəyə mövqeyini bildirdiyini, bu qətliamı törədən sovet rəhbərlərinin hərəkətini kəskin şəkildə pislədiyini diqqətə çatdırmışdır.
E.Əmirbəyov vurğulamışdır ki, məhz ulu öndər Heydər Əliyevin təşəbbüsü ilə 1994-cü ilin fevral ayında Milli Məclis tərəfindən 20 Yanvar hadisələrinə siyasi qiymət verilmişdir.
Ermənistan-Azərbaycan, Dağlıq Qarabağ münaqişəsindən danışan səfir hələlik həllini tapmayan bu məsələnin xalqımız üçün ən ağrılı problem olduğunu qeyd etmişdir. O, işğal altındakı torpaqlarımızın Ulu Öndərin layiqli davamçısı Prezident İlham Əliyevin uğurlu siyasəti nəticəsində yaxın vaxtlarda azad olunacağına əminliyini bildirmişdir.
Tədbirdə səfirliyin və Azərbaycanın UNESCO yanındakı daimi nümayəndəliyinin əməkdaşları, diasporun təmsilçiləri iştirak etmişlər.
Sonda səfirlikdə şəhidlərin xatirəsinə ehsan verilmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
