Parlament seçkilərinin başlaması ilə əlaqədar Mərkəzi Seçki Komissiyasında mətbuat konfransı keçirilib
Bakı, 1 sentyabr, AZƏRTAC
Sentyabrın 1-də ölkəmizin bütün suveren ərazisində VII çağırış Azərbaycan Respublikasının Milli Məclisinə növbədənkənar seçkilər keçirilir. Mərkəzi Seçki Komissiyasında (MSK) növbədənkənar seçkilərin keçirilməsi ilə əlaqədar mətbuat konfransı təşkil olunub.
AZƏRTAC xəbər verir ki, Azərbaycan Respublikasının Dövlət Himninin səsləndirilməsi ilə başlayan tədbirdə çıxış edən MSK-nın sədri Məzahir Pənahov bütün seçki məntəqələrinin səsvermə üçün tam hazır vəziyyətə gətirildiyini bildirib. Qeyd edib ki, seçkilər elan olunduqdan sonra MSK tərəfindən bütün lazımi tədbirlər görülüb. MSK və dairə seçki komissiyaları bütün addımları Seçki Məcəlləsinin tələblərinə uyğun atıb.
Sədr bildirib ki, seçkilər Azərbaycanda böyük hadisəyə çevrilib. Parlament seçkiləri ilk dəfə ölkəmizin bütün suveren ərazisində keçiriləcək.
Məzahir Pənahov deyib ki, parlament seçkiləri 125 seçki dairəsi üzrə 6478 məntəqədə keçirilir. Seçkilərlə əlaqədar yaradılan 125 dairənin 10-nun məcburi köçkün dairələri olduğunu vurğulayan MSK sədri əlavə edib ki, Milli Məclisə seçkilərdə 397 min 862 məcburi köçkün 574 məntəqədə səs verə biləcək. Hazırda azad olunmuş ərazilərdə 54 seçki məntəqəsi fəaliyyət göstərir.
Şəffaflığın təmin olunması məqsədilə 6478 məntəqənin minində veb-kameralar quraşdırılıb.
Məntəqələrə 6 milyon 516 min 567 seçki bülleteni paylanılıb.
Sədr qeyd edib ki, 6 milyon 421 min 960 vətəndaş bu gün keçirilən parlament seçkilərində səsvermə hüququndan istifadə edə biləcək.
MSK sədri diqqətə çatdırıb ki, parlament seçkilərində deputat mandatı uğrunda 990 namizəd mübarizə aparacaq. Qeydə alınanlardan 305 nəfərin namizədliyi siyasi partiyalar tərəfindən irəli sürülüb. “Azərbaycanda keçirilən seçkilərə beynəlxalq miqyasda böyük maraq var. Beynəlxalq müşahidəçilərin əksəriyyəti seçkilər üzrə böyük təcrübəyə malikdir və onların fikirləri əhəmiyyətlidir”, - deyə o əlavə edib.
M.Pənahov vurğulayıb ki, seçkilərdə beynəlxalq müşahidəçilər çox geniş şəkildə təmsil olunublar. 598 beynəlxalq müşahidəçi seçkiləri izləyə biləcək. Bundan əlavə, 112 min 749 yerli müşahidəçi də seçkiləri izləyəcək.
Diqqətə çatdırılıb ki, Milli Məclisə növbədənkənar seçkiləri 22 beynəlxalq media nümayəndəsi də işıqlandıra biləcək.
Onun sözlərinə görə, parlament seçkiləri ilə əlaqədar “exit-poll” keçirmək üçün Mərkəzi Seçki Komissiyasında üç təşkilat - Vətəndaşların Əmək Hüquqlarını Müdafiə Liqası, "Tərəqqi" sosial tədqiqatlar ictimai birliyi və “Sosioloji Tədqiqatlar Mərkəzi” qeydə alınıb. Onlardan ikisi öz fəaliyyətlərini xarici partnyorları ilə birgə qurublar.
Məzahir Pənahov seçkiləri izləyəcək yerli müşahidəçilərin 65 minə yaxınının 25 siyasi partiyanın nümayəndələri olduqlarını da qeyd edib.
2008-ci ildən seçkilərin müşahidəsində veb-kameralar praktikasından istifadə edildiyini deyən M.Pənahov istənilən ölkədən maraqlı tərəfin Mərkəzi Seçki Komissiyasının saytına daxil olaraq seçkiləri müşahidə edə biləcəyini vurğulayıb. Bildirib ki, bu da seçkilərdə aşkarlığın bir nümunəsidir.
MSK sədri seçiciləri fəal olmağa çağırıb. Deyib ki, daxil olan ilkin nəticələr bu gün ictimaiyyətə çatdırılacaq. Bütün müraciətlərə operativ şəkildə cavab verilir.
Bölmənin digər xəbərləri
