Parlament sədri: Nəqliyyat infrastrukturunu təkmilləşdirməklə bölgəmizi qitələr arasında cəlbedici əlaqəyə çevirə bilərik
Tbilisi, 30 iyun, AZƏRTAC
Bu gün regionumuz ticarət, nəqliyyat, enerji və rəqəmsal bağlantı mərkəzi kimi rolunu gücləndirmək üçün böyük potensiala malikdir. Orta Dəhlizin inkişafı xüsusi əhəmiyyət kəsb edir.
AZƏRTAC xəbər verir ki, bu sözləri Gürcüstan Parlamentinin sədri Şalva Papuaşvili Qara Dəniz İqtisadi Əməkdaşlıq Təşkilatı Parlament Assambleyasının (PABSEC) 67-ci plenar iclasındakı çıxışında bildirib.
Onun sözlərinə görə, nəqliyyat infrastrukturunu təkmilləşdirməklə, logistika şəbəkələrini inkişaf etdirməklə, ticarəti asanlaşdırmaqla və multimodal əlaqəni gücləndirməklə bölgəni regionlar və qitələr arasında cəlbedici, etibarlı əlaqəyə çevirə bilərik.
“Bu ayın əvvəlində Gürcüstan, Azərbaycan və Türkiyənin birgə strateji layihəsi olan Bakı-Tbilisi-Qars dəmir yolu xətti istifadəyə verildi. Bu, praktik əməkdaşlığın qarşılıqlı fayda gətirə biləcəyinin və ortaq vizyonumuzun həyata keçirilməsinə necə töhfə verə biləcəyinin bariz nümunəsidir”, - deyə Gürcüstan Parlamentinin sədri qeyd edib.
Bölmənin digər xəbərləri
