“PAŞA Holdinq” Daşkənddə “INMerge” İnnovasiya Sammiti təşkil edib
Bakı, 1 may, AZƏRTAC
Özbəkistan paytaxtında “PAŞA Holdinq” tərəfindən təşkil edilən “INMerge Daşkənd - 2026” konfransı keçirilib.
AZƏRTAC rəsmi UZA agentliyinə istinadla xəbər verir ki, İstanbul tədbirindən sonra Daşkənd sammiti ekosisteminin nümayəndələrini, investorları və korporativ sektorun təmsilçilərini, innovasiya sahəsində regional və qlobal liderləri bir araya gətirib. İştirakçılar Mərkəzi Asiyada rəqəmsal iqtisadiyyatın və innovasiya mühitinin inkişafı məsələlərini müzakirə ediblər.
Proqram qlobal dəyişikliklər qarşısında liderliyin transformasiyası ilə bağlı Kaspar Kreyvenin əsas çıxışı ilə başlayıb. O qeyd edib ki, yeni reallıqlar ənənəvi yanaşmaların və qərar qəbuletmədə çevikliyin yenidən düşünülməsini tələb edir.
Gündəlik rəqəmsal ekosistemlərin formalaşması ilə bağlı əsas panel müzakirəsi ən yaddaqalan məqamlardan biri olub. Özbəkistan şirkətlərinin nümayəndələri müştəri mərkəzli platformaların bazarı necə dəyişdirdiyini və əlavə dəyər yaratdığını müzakirə ediblər.
Özbəkistan “Fintech” assosiasiyasının sədri Nərgiz Dustmatova sessiyaya moderatorluq edib. İştirakçılar texnologiya, məlumatlar və istifadəçi təcrübəsi arasındakı sinerjinin bu cür həllərin hazırlanmasında əsas rol oynadığı barədə ortaq məxrəcə gəliblər.
“PAŞA Holdinq”in investisiya meneceri Ülviyyə Mehralıyeva qeyd edib: “Vurğulamaq istərdim ki, “INMerge” sammiti təkcə Azərbaycanda deyil, həm də regionda startapları, innovasiya ekosistemlərinin nümayəndələrini, korporativ sektoru və dövlət qurumlarını innovasiyanın gələcəyini formalaşdırmaq üçün birləşdirən qlobal platformadır. Əsas amalımız əlaqələrin və əməkdaşlığın gücünə inamımızdır. İnanırıq ki, bütün əsas ekosistem iştirakçılarının bir araya gəldiyi bir məkan yaratmaq inkişafa əhəmiyyətli təsir göstərə və real dəyişikliklərə gətirib çıxara bilər. İstədiyimiz effekti dialoq, çətinliklərin müzakirəsi və yeni imkanların axtarışı vasitəsilə əldə edirik. Hər il əsas forumu, - bu il altıncı dəfə, - 8-9 oktyabr tarixlərində Bakıda keçiririk. Əsas tədbirdən əvvəl yüksək dərəcədə uğurlu olduğunu sübut edən “INMerge”ə yol” adlı bir sıra regional tədbirlər təşkil edirik.
Daşkənd tədbirində süni intellektin gündəlik həyata təsiri, habelə yeni çətinliklərdən tutmuş istifadəçilərin real ehtiyaclarına yönəlmiş innovativ məhsulların yaradılmasına qədər aktual mövzular müzakirə olunacaq. Tədbirdə regionun müxtəlif ölkələrindən - Azərbaycan, Qazaxıstan və Özbəkistandan nümayəndələr iştirak edirlər. Növbəti məkan iyun ayında yeni bir tədbirin keçiriləcəyi Berlin olacaq”.
Sammitin Mərkəzi Asiyada keçirilməsinin mühüm addım olduğunu qeyd edən menecer vurğulayıb: “Daşkənddən danışmışkən, biz bu il onu Mərkəzi Asiyada uyğun yer kimi seçdik. Biz şəhərdə həm texnologiya, həm də startap ekosisteminin inkişafı üçün böyük potensial görürük. Bunu Özbəkistan startaplarından alınan müraciətlərin keyfiyyəti də təsdiqləyir”.
Tədbir startap təqdimatı müsabiqəsi ilə başa çatıb və üç qalib layihə 8-9 oktyabr 2026-cı il tarixlərində Bakıda keçiriləcək əsas “INMerge” sammitində öz həllərini təqdim etmək imkanı qazanıb.
Bölmənin digər xəbərləri
