Patent müvəkkilliyinə namizədlər aprelin 12-də imtahan verəcəklər
Bakı, 3 aprel, AZƏRTAC
Aprelin 12-də Dövlət İmtahanı Mərkəzi (DİM) patent müvəkkili statusu almaq istəyən namizədlər üçün attestasiyanın birinci mərhələsi üzrə test imtahanı keçirəcək. İmtahan saat 11:00-da başlanacaq.
Bu barədə AZƏRTAC-a Əqli Mülkiyyət Agentliyindən məlumat verilib.
Namizədlər buraxılış vərəqəsini əvvəlcədən DİM-in rəsmi internet səhifəsindən əldə edə bilərlər. Buraxılış vərəqəsi və imtahanla bağlı digər zəruri məlumatlar, o cümlədən “Yaddaş kitabçası”nın tam mətni DİM-in internet saytında yerləşdirilib.
Xatırladaq ki, patent müvəkkili statusu almaq istəyən şəxslərin attestasiyasının keçirilməsi üçün Əqli Mülkiyyət Agentliyinin Attestasiya Komissiyası tərəfindən fevralın 18-də sənəd qəbulu elan edilib. Sənəd qəbulu martın 11-də başa çatıb. Patent müvəkkili olmaq üçün 40 nəfərin namizədliyi təsdiq olunub.
Onu da qeyd edək ki, patent müvəkkili olmaq üçün attestasiya test imtahanı və Attestasiya Komissiyası tərəfindən keçirilən müsahibədən ibarət olmaqla iki mərhələdə keçiriləcək.
Bölmənin digər xəbərləri
