Paytaxtda silsilə oğurluqlar edən şəxslər yaxalanıb
Bakı, 31 mart, AZƏRTAC
Paytaxtda silsilə oğurluqlar edən şəxslər yaxalanıb.
Daxili İşlər Nazirliyinin mətbuat xidmətindən AZƏRTAC-a verilən məlumata görə, N.Osmanovun 50 manat məbləğində pulunu, 1150 manat dəyərində qol saatı və qızıl-zinət əşyalarını və bir evdən 150 manat məbləğində pul, iki min ABŞ dolları, 10 min 950 manat dəyərində qızıl-zinət, gümüş və məişət əşyaları oğurlamaqda şübhəli bilinən Sumqayıt şəhər sakini N.Ələsgərov, Beyləqan rayon sakini O.Əliyev və Bakı şəhər sakini Ə.Əsədov Bakı Şəhər Baş Polis İdarəsinin və Sabunçu Rayon Polis İdarəsinin 15-ci polis bölməsi əməkdaşlarının birgə keçirdikləri əməliyyat-axtarış tədbirləri nəticəsində saxlanılıb.
N.Ələsgərovun və O.Əliyevin barəsində aparılmış əməliyyat tədbirləri ilə onların Şərur rayon sakini F.Əliyevlə birgə daha bir evdən 500 manat məbləğində pul və 20 min 700 manat dəyərində qızıl-zinət əşyaları oğurlamaları da müəyyən edilib.
Davam etdirilən tədbirlərlə F.Əliyev də polis əməkdaşları tərəfindən saxlanılıb.
Faktla bağlı araşdırma aparılır.
Bölmənin digər xəbərləri
