Pekində Azərbaycanın investisiya mühiti və iqtisadiyyatına dair təqdimat keçirilib VİDEO
Pekin, 1 iyun, AZƏRTAC
Pekində davam edən 6-cı Çin beynəlxalq ticarət xidməti sərgisi - CIFTIS çərçivəsində Azərbaycanın investisiya mühiti və iqtisadiyyatı mövzusunda təqdimat keçirilib.
AZƏRTAC xəbər verir ki, İqtisadiyyat Nazirliyinin və ölkəmizin Çindəki səfirliyinin dəstəyi, Azərbaycanın Pekindəki ticarət nümayəndəliyinin və CIFTIS-in təşkilat komitəsinin birgə əməkdaşlığı ilə keçirilən tədbirdə yerli iş adamları, biznes assosiasiyalarının nümayəndələri, turizm şirkətlərinin əməkdaşları iştirak ediblər. Təqdimat yerli sahibkarların diqqətini Azərbaycana yönəltmək, çinli investorları üçün ölkəmizdəki əlverişli biznes mühitinin üstünlükləri barədə məlumatlandırmaq, bundan başqa, çinli turistləri ölkəmizə səyahətə təşviq etmək məqsədilə təşkil olunub.
Azərbaycanın "Bir kəmər, bir yol" təşəbbüsündəki rolu barədə çıxış edən ölkəmizin Çindəki ticarət nümayəndəsi Teymur Nadiroğlu bildirib ki, Azərbaycan bu təşəbbüsü dəstəkləyən ilk ölkələrdən biri olmaqla yanaşı, özünün iqtisadi-nəqliyyat imkanları ilə bu strategiyanın icrasına töhfələr verir. Ötən ay Pekində 2-ci "Bir kəmər, bir yol" beynəlxalq əməkdaşlıq forumunda çıxış edən Prezident İlham Əliyev Azərbaycanın bu təşəbbüsün icrasına hərtərəfli dəstək verməyə hazır olduğunu bir daha bəyan edib.
T.Nadiroğlu mühüm ticarət yollarının üzərində yerləşən Azərbaycanın Bakı-Tbilisi-Qars dəmir yolu da daxil olmaqla Transxəzər Beynəlxalq Nəqliyyat Dəhlizi vasitəsilə Çin ilə Avropa arasında yüklərin daha tez müddətə daşınmasını həyata keçirdiyini bildirib. Azərbaycan təkcə tranzit ölkə olmağı deyil, həm də daha çox xarici, o cümlədən Çin investorlarını ölkə iqtisadiyyatına cəlb etməklə istehsalçı və ixracatçı dövlət olmağı hədəfləyib.
Qeyd olunub ki, "Bir kəmər, bir yol" təşəbbüsünün irəli sürülməsindən sonra Azərbaycan ilə Çin arasında ticarət dövriyyəsi təxminən iki dəfə artaraq ötən il 1,3 milyard dollar təşkil edib. Keçən ay Pekində keçirilən 2-ci "Bir kəmər, bir yol" beynəlxalq əməkdaşlıq forumu çərçivəsində Azərbaycan və Çin şirkətləri arasında ümumi dəyəri 821 milyon dollarlıq 10 sənəd imzalanıb. "Made in Azerbaijan" brendi ilə istehsal olunan məhsulların Çinə ixracının təmin olunması məqsədilə Şanxay, Urumçi və Lucou şəhərlərində Azərbaycanın ticarət və şərab evləri açılıb. Azərbaycandan Çinin bir neçə şəhərinə ixrac missiyaları təşkil edilib. Bundan başqa, Azərbaycan birinci Çin beynəlxalq idxal sərgisi də daxil olmaqla bu ölkədə keçirilən sərgilərdə fəal iştirak edir. Bütün bunlar ikitərəfli iqtisadi-ticarət əlaqələrinin inkişafı baxımından əhəmiyyətli faktlardır.
"Azərbaycanın investisiya mühiti və əsas iqtisadi göstəriciləri" mövzusunda təqdimatla çıxış edən ticarət nümayəndəliyinin əməkdaşı Natiq Xəlilov ölkəmizdə qeyri-neft sektorunun inkişafı istiqamətində görülən tədbirlərdən, irimiqyaslı infrastruktur layihələrdən, iqtisadiyyatın müxtəlif istiqamətləri, o cümlədən sənaye, kənd təsərrüfatı, informasiya-kommunikasiya texnologiyaları sahələrində invsetorlar üçün yaradılmış əlverişli şəraitdən danışıb, sənaye parklarındakı imtiyazlı şərait və çinli iş adamları üçün maraq doğuracaq investisiya sahələri barədə məlumat verib. O, Dünya Bankının "Doing Business 2019" hesabatında Azərbaycanın 32 pillə irəliləyərək 190 ölkə arasında 25-ci yerdə qərarlaşdığı və 10 ən islahatçı ölkə sırasına daxil edildiyini diqqətə çatdırıb.
Tədbir çərçivəsində Azərbaycanın turizm potensialına dair təqdimatda ölkəmizdə bu sahənin inkişafından, Bakıda və regionlarda müasir tələblərə cavab verən turizm mərkəzlərinin fəaliyyətindən söz açılıb. Bildirilib ki, hazırda Bakı ilə Pekin və Urumçi şəhərləri arasında birbaşa hava əlaqəsinin mövcudluğu, Çin vətəndaşları üçün sadələşdirilmiş viza rejiminin tətbiqi, habelə "ASAN Viza" sisteminin fəaliyyəti çinli turistlərin Azərbaycana səfər imkanlarını genişləndirib.
"Azərbaycan Hava Yolları" QSC-nin Pekin nümayəndəliyinin rəhbəri Rinat Əzizov ölkəmizin milli aviadaşıyıcısı haqqında məlumat verərək deyib ki, şirkətin ümumi marşrut şəbəkəsi 25 ölkədə 40 istiqamətdən ibarətdir. Qərargahı "Skytrax" auditor şirkətinin "5 ulduz" reytinqinə layiq gördüyü Heydər Əliyev Beynəlxalq Aeroportunda yerləşən AZAL hazırda Bakı-Pekin-Bakı istiqamətində birbaşa müntəzəm uçuşlar həyata keçirir. Gələcəkdə Bakıdan Çinin digər şəhərlərinə də reyslərin açılması planları var.
Lucou şəhərindəki Azərbaycan Ticarət Evini işlədən "Eastern Allfriends" şirkətinin icraçı direktoru Lin Qan Azərbaycan məhsullarının bu ölkəyə ixrac vəziyyətindən və imkanlardan, Çin Milli Qida və Fermentasiya Sənayesi Tədqiqatı İnstitutunun məsul işçisi Yu Bin Azərbaycanın şərabçılıq ənənələri, dadı və keyfiyyəti ilə seçilən Azərbaycan şərablarının Çinə ixracı barədə danışıb. Sonda tədbir iştirakçılarının müxtəlif mövzularda sualları cavablandırılıb.
Qeyd edək ki, ümumilikdə 137 ölkənin təmsil olunduğu bu ilki CIFTIS sərgisində Azərbaycan öz milli pavilyonu ilə ilk dəfə iştirak edir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
