Peruda denge qızdırmasına yoluxma halları 73 mini keçib
Bakı, 16 may, AZƏRTAC
Peruda denge qızdırmasına yoluxma hallarının 73 mini keçdiyi bildirilir.
AZƏRTAC Anadolu Agentliyinə istinadla xəbər verir ki, Perunun səhiyyə naziri Rosa Qutierrez denge qızdırması ilə mübarizə üçün 10 milyon dollar büdcə ayırdıqlarını açıqlayıb. Səhiyyə Nazirliyinin məlumatlarına görə, denge qızdırmasına yoluxanların sayı 73 min, virus səbəbindən həyatını itirənlərin sayı 80-dir. Hökumət xəstəlik səbəbindən 226 rayonda fövqəladə vəziyyətin 4 ay müddətinə uzadıldığını bildirib.
Perunun bəzi bölgələrində denge qızdırması səbəbindən xəstəxanalarda pasiyentlərin sayının xeyli artığı qeyd edilib. Ölkədə yoluxma hallarının artması ilə əlaqədar fevralın 25-dən 13 bölgədə səhiyyə ilə bağlı fövqəladə vəziyyət elan edilib.
Denge virusu insanlara ağcaqanadlar vasitəsilə ötürülür. İnkubasiya dövründən sonra ümumiyyətlə yüngül hərarətə səbəb olan xəstəlik bəzi hallarda ölümlə nəticələnə bilər. Yoluxma halları yağıntının çox olduğu aylarda artır.
Alimlər xəstəliyə səbəb olan ağcaqanad növlərinin su gölməçələrində sürfələr əmələ gətirdiyi üçün həmin gölməçələrin davamlı olaraq dərmanlanmalı olduğu bildirib.
Bölmənin digər xəbərləri
