Pirallahıda “Vətən uğrunda” abidə-kompleksi açılmışdır
Bakı, 21 yanvar (AZƏRTAC). Yanvarın 20-də Pirallahı qəsəbəsində ucaldılmış “Vətən uğrunda” abidə-kompleksinin açılışı və 20 Yanvar faciəsinin 24-cü ildönümü ilə əlaqədar anım mərasimi keçirilmişdir. Tədbirdə Pirallahı Rayon İcra Hakimiyyətinin (RİH) başçısı Vasif İmanov, Milli Məclisin deputatı Aydın Mirzəzadə, YAP Siyasi Şurasının üzvəri və digərləri iştirak etmişlər.
Pirallahı RİH-dən AZƏRTAC-a bildirilmişdir ki, “Vətən uğrunda” abidə-kompleksin önünə toplaşan tədbir iştirakçıları tərəfindən Azərbaycanın azadlığı, istiqlaliyyəti və suverenliyi yolunda şəhid olmuş Vətən övladlarının əziz xatirəsi bir dəqiqəlik sükutla yad olunmuşdur. Vasif İmanov açılışı simvolizə edən əbədi məşəli alovlandırmışdır. Tədbir iştirakçıları abidə-kompleksin önünə al qərənfillər düzmüşlər. Vətənin dar günündə silaha sarılaraq Qarabağ cəbhəsinə yollanan və şəhidlik zirvəsinə ucalan igid oğulların əziz xatirəsinə Pirallahı qəsəbəsində inşa edilən “Vətən uğrunda” abidə-kompleksin ümumi sahəsi 2800 kvadratmetr təşkil edir. Kompleks, aypara formasında inşa edilmiş və yuxarıdan baxdıqda aypara və səkkizguşəli ulduz şəklində görünür. Qəsəbənin mərkəzində yerləşən bu abidədə 36 şəhidin mərmər lövhə üzərində şəkilləri, həmçinin ad və soyadları həkk olunmuşdur. Abidənin ön hissəsində Pirallahı rayonunun Milli Qəhrəmanlarının - Yavər Əliyev və Rasim İbrahimovun şəkilləri yerləşdirilmişdir.
Tədbir iştirakçılarına müraciət edən V.İmanov qeyd etmişdir ki, 1990-cı ilin 20 yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilməmişdir.
20 yanvar hadisələri barədə geniş bəhs edən V.İmanov xüsusi vurğulamışdır ki, 1987-ci ildə Sovet İttifaqı rəhbərliyindən uzaqlaşdırılan, lakin bundan sonra da Moskvanın təqib və təzyiqlərinə məruz qalan ulu öndər Heydər Əliyev Bakıda törədilən faciənin ertəsi günü - yanvarın 21-də onu gözləyən bütün təhlükələrə baxmayaraq ailə üzvləri ilə birgə Azərbaycanın Moskvadakı daimi nümayəndəliyinə gəlib mətbuat konfransı keçirmiş və kəskin bəyanatla çıxış edərək, sovet rəhbərliyinin Azərbaycan xalqına qarşı təcavüzünü açıq şəkildə pisləmişdir.
Ulu öndər Heydər Əliyevin hakimiyyətə qayıdışından sonra 20 Yanvar hadisələrini lazımınca qiymətləndirmək yolunda ciddi addımlar atılmışdır. Azərbaycan Respublikası Prezidentinin 5 yanvar 1994-cü il tarixli fərmanı ilə Milli Məclisə 20 Yanvar hadisələrinə tam siyasi-hüquqi qiymət verməsi tövsiyə olunmuşdur. Azərbaycan Respublikasının Milli Məclisi həmin məsələyə xüsusi sessiya həsr edərək bir neçə gün davam edən iclaslarında Qara Yanvar hadisələrinin əsl səbəblərini açıqlamış, həqiqi günahkarları aşkar etmişdir. 1990-cı il yanvarın 20-də törədilmiş faciəli hadisələrə Milli Məclisin 29 mart 1994-cü il tarixli qərarı ilə siyasi-hüquqi qiymət verilmiş, faciənin günahkarlarının adları açıq şəkildə bəyan edilmişdir.
V.İmanov vurğulamışdır ki, şəhid ailələri və 20 Yanvar faciəsində xəsarət alanlar ümummilli lider Heydər Əliyevin siyasi kursunu uğurla davam etdirən Prezident İlham Əliyev tərəfindən daim diqqət və qayğı ilə əhatə olunmuşlar, dövlət başçısı onların hər bir probleminin ən qısa müddətdə həll olunması məqsədilə əlaqədar orqanlara müvafiq göstərişlər vermişdir.
1998-ci ildə ümummilli lider Heydər Əliyev tərəfindən imzalanan “20 Yanvar şəhidi” fəxri adının təsis edilməsi haqqında fərmanı yada salan İcra Hakimiyyəti Başçısı bir daha qeyd etmişdir ki, 20 Yanvar xalqımızın qəhrəmanlıq günüdür.
Anım tədbirində çıxış edənlər 1990-cı ilin 20 yanvarında keçmiş sovet dövlətinin hərb maşınının Azərbaycan xalqına qarşı həyata keçirdiyi qətllərin insanlığa qarşı törədilmiş ən ağır cinayətlərdən biri kimi bəşər tarixində qara səhifə olaraq qalacağını vurğulamışlar. Bildirilmişdir ki, milli azadlıq naminə, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini, mənfur erməni xislətinin iç üzünü bütün dünyaya bir daha nümayiş etdirmişdir.
Çıxış edənlər and yerimiz, şərəfimiz, qürur mənbəyimiz olan şəhidlərin əziz xatirəsinə ucaldılan abidəyə görə, şəhid ailələrinə göstərilən dövlət qayğısına görə minnətdarlıqlarını bildirmişlər. Azadlıq yolunda həyatını qurban vermiş şəhidlərimizin fədakarlığının xalqımızın qəlbində daim yaşayacağını, gələcək nəsillər üçün qəhrəmanlıq məktəbi olacağını vurğulamışlar.
Daha sonra Pirallahı rayonu orta məktəblərinin şagirdləri 20 Yanvara və şəhidlərə həsr olunmuş ədəbi-bədii kompozisiya nümayiş etdirdilər və şeirlər söyləmişlər. Tədbirin sonunda Pirallahı məscidinin axundu şəhidlərin ruhuna dualar oxumuşdur.
Bölmənin digər xəbərləri
