Bakı, 28 oktyabr, AZƏRTAC

Azərbaycan Prezidenti İlham Əliyevin 20 illik prezidentlik fəaliyyəti dövrü möhtəşəm uğurlarla zəngin olmaqla yanaşı, çətinliklər, daxili və xarici təhdidlərdən, təzyiqlərdən də xali deyildi. Təbii ki, qeyd olunan müddət ölkəmizin strateji hədəflərə nail olması baxımından milli dövlətçiliyimizin ən parlaq səhifəsidir. Ulu Öndər Heydər Əliyevin qurduğu müasir müstəqil Azərbaycanı Prezident İlham Əliyev suveren, güclü bir dövlətə çevirdi. O, adını dövlətimizin son 200 illik tarixinə Zəfər qazanaraq torpaqlarımızı geri qaytaran və Azərbaycanı bütövləşdirən Sərkərdə kimi qızıl hərflərlə yazdırdı. Yaradılmış güclü, qüdrətli dövlət sayəsində bu gün dünyada Azərbaycanla hesablaşır, ona hörmət edirlər. Hətta bizə həsəd aparanlar, paxıllıq edənlər də az deyil. Çünki dünyada çox az sayda ölkə var ki, öz ərazisində separatizmin kökünü kəsə, ərazi bütövlüyünü təmin edə bilib.

Bu sözləri AZƏRTAC-a açıqlamasında politoloq Ramiz Alıyev söyləyib.

Onun sözlərinə görə, Prezident İlham Əliyev Ümummilli Lider Heydər Əliyevin siyasi irsini davam etdirərək, onun yaratdığı möhkəm təməl əsasında dövlətimizi strateji hədəflərə doğru uğurla apardı. “Nəyi, nə vaxt və necə etməyi” çox dəqiq bilən dövlətimizin başçısı əsas hədəf kimi Azərbaycanın zəngin və qüdrətli ölkəyə çevrilməsi üçün yol xəritəsini müəyyənləşdirdi. “Güclü iqtisadi potensialın formalaşdırılması, müasir cəmiyyət quruculuğu, qüdrətli Ordunun yaradılması, qarşılıqlı etimada və əməkdaşlığa əsaslanan xarici əlaqələr üzrə aparılan məqsədyönlü fəaliyyət Azərbaycanı regionun aparıcı dövlətinə çevirdi. Prezident İlham Əliyev milli iqtisadiyyatımızda istehsal və ixrac imkanlarının genişləndirilməsini hədəfləyən çoxsaylı fərman və sərəncamlar imzaladı. Bu sənədlər ölkəmizdə yüksək rəqabət qabiliyyətinə malik liberal iqtisadiyyatın formalaşmasına, şəffaflığın təmin olunmasına, biznes mühitinin optimallaşmasına, büdcə daxilolmalarının artmasına zəmin yaratdı. Milli iqtisadiyyatımızın inkişafı istiqamətində atılan ən mühüm addımlardan biri Trans-Anadolu (TANAP) və Trans-Adriatik (TAP) qaz kəmərlərinin tikintisi layihələridir. Avropanın enerji təhlükəsizliyinin təmin olunmasında mühüm rol oynayan Azərbaycan Cənub Qaz Dəhlizi layihəsinin aparıcı qüvvəsidir. Xəzərin Azərbaycan sektorundakı “Azəri”, “Çıraq”, “Günəşli” yataqlarının birgə işlənməsi və neft hasilatının pay bölgüsü haqqında yeni sazişin imzalanması ölkəmizin dünya enerji sənayesində həlledici rolunu bir daha təsdiqlədi. Bakı-Tbilisi-Qars dəmir yolunun açılışı ilə ölkəmiz Şərqi və Qərbi birləşdirən strateji layihələrin keçdiyi bir ölkə statusunu qazandı. Bir vaxtlar özünü elektrik enerjisi və “mavi yanacaq” ilə tam təmin edə bilməyən Azərbaycanın bu gün elektrik enerjisi və təbii qazı xarici ölkələrə nəql olunur, Avropanı isidir. Son 20 ildə qazanılan iqtisadi uğurlarımızı saymaqla bitirmək üçün bizə saatlarla, günlərlə vaxt lazımdır”, - deyə politoloq əlavə edib.

Müzəffər Ali Baş Komandanın qarşısına qoyduğu ən böyük missiyanı - Azərbaycanın ərazi bütövlüyünün bərpasını reallaşdırdığını qeyd edən R.Alıyev deyib: “Təbii ki, Qarabağ Zəfəri Azərbaycan Prezidentinin 20 illik fəaliyyətində mühüm yer tutur. Dövlətimizin başçısı Qarabağın hər yerində Azərbaycan Bayrağını ucaldıb, tarixi ədaləti bərpa edib, sınmış qürurumuzu özümüzə qaytarıb. Biz bu gün fəxrlə və qürur hissi ilə deyirik ki, suverenliyimiz və ərazi bütövlüyümüz tam bərpa olundu. O, bir vaxtlar bizə əlçatmaz görünən Şuşanı, Xocalını, Xankəndini Azərbaycan xalqına qaytardı. Hər bir xalq və dövlət üçün bundan gözəl uğur, bundan böyük nəticə ola bilərmi? Oktyabrın 15-də Prezident İlham Əliyevin Ağdərəyə, Xocalıya, Əsgərana və Xankəndiyə səfərləri, orada Azərbaycanın Dövlət Bayrağını ucaltması dünyanın aparıcı media qurumları tərəfindən geniş şəkildə işıqlandırıldı. Budur Azərbaycanın gücü, budur bizim nüfuzumuz”.

Hazırda işğaldan azad olunmuş ərazilərdə genişmiqyaslı bərpa-quruculuq işlərinin aparıldığını xatırladan politoloq bildirib ki, müharibə başa çatandan bəri bu işlərə təxminən 7 milyard dollar vəsait ayrılıb. Azərbaycan bu maliyyəni daxili imkanları hesabına təmin edir. Bütün bunlar göstərir ki, Azərbaycan sosial-iqtisadi inkişaf üçün zəruri olan etibarlı “maliyyə yastığı”na malik olan ölkədir. Prezident İlham Əliyevin Sərəncamı ilə təsdiqlənmiş və 2022-2026-cı illəri əhatə edən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" yüksək səviyyədə icra olunur. Bütün bunlar bizə Qarabağda görülən işlərin miqyasını təsəvvür etməyə imkan verir. Həm Qarabağda, həm də respublikamızın ayrı-ayrı bölgələrində aparılan quruculuq işlərinin bir hədəfi var - Azərbaycan vətəndaşının sosial rifahını yüksəltmək və güclü dövlət qurmaq. Şübhə yoxdur ki, Azərbaycan xalqı Prezident İlham Əliyevin rəhbərliyi ilə daha böyük uğurlara imza atacaq.