Politoloq: Prezident İlham Əliyevin İslam dünyasına haqlı müraciətləri öz töhfəsini verməkdədir
Bakı, 30 mart, AZƏRTAC
İkinci Qarabağ müharibəsindən sonra Azərbaycanın döyüş meydanında darmadağın etdiyi Ermənistana, həmçinin dünya erməniliyinə qarşı siyasi və diplomatik mübarizəsi davam edir. Əslində, bu proses elə 44 günlük müharibə zamanı qarşı tərəfin sülhə məcbur edilməsinin məntiqi davamıdır. Çünki ərazilərinin işğaldan azad edilməsi və ərazi bütövlüyünün təmin olunması prosesini həyata keçirən dövlətimiz apardığı ədalətli mübarizəsinin və onun nəticələrinin rəsmiləşdirilməsində haqlı olduğu kimi, həm də israrlı və qətiyyətlidir. Bu istiqamətdə ölkəmizin növbəti uğuru beynəlxalq aləmdə çox nüfuzlu təşkilatlardan biri olan İslam Əməkdaşlıq Təşkilatı (İƏT) Xarici İşlər Nazirləri Şurasının (XİNŞ) martın 22-23-də ölkəmizin ən yaxın müttəfiqlərindən olan Pakistanın İslamabad şəhərində keçirilən 48-ci sessiyası müstəvisində əldə edildi.
Bu sözləri AZƏRTAC-a açıqlamasında politoloq Xəyal Bəşirov bildirib.
O qeyd edib ki, “Birlik, ədalət və inkişaf naminə tərəfdaşlığın qurulması” mövzusunda keçirilən bu sessiyada Azərbaycan yüksək səviyyədə təmsil olundu. Azərbaycanın möhtəşəm qələbəsi və Ermənistanın biabırçı məğlubiyyətini əks etdirən kapitulyasiyası ilə bitən İkinci Qarabağ müharibəsindən bir neçə gün sonra azad etdiyimiz ərazilərə müntəzəm şəkildə səfərlər edən Prezident İlham Əliyevin və Birinci vitse-prezident Mehriban Əliyevanın əsas məqsədlərindən biri də tarixi torpaqlarımızda törədilən erməni vəhşiliyinin və vandalizminin bariz nümunələrini dünyaya göstərmək idi. Bununla paralel olaraq, beynəlxalq ictimaiyyətin tanınmış nümayəndələrinin, diplomatların, jurnalistlərin və digər nüfuzlu şəxslərin Azərbaycana dəvət olunaraq həmin ərazilərdəki mövcud vəziyyətlə tanış edilməsi də bu məqsədi daşıyırdı. Azərbaycan dövləti son 30 il ərzində regionda baş verən reallıqları yaxından izləmək və gözləri ilə görmək üçün bütün qapılarını dünyaya açıb. İkili standartların və ədalətsizliyin hökm sürdüyü dünyamızda bu cür tarixi reallıqlara və həqiqətlərə göz yumanlarla yanaşı, onları görənlər, haqq səsimizə səs verənlər də az deyil. Belə ədalətli və haqlı yanaşma tərzini sərgiləyənlərdən biri də uğurla təmsil olunduğumuz nüfuzlu beynəlxalq platformalardan biri olan İslam Əməkdaşlıq Təşkilatıdır. Təbii ki, bu təşkilatın hazırkı ədalətli münasibətinin sərgiləməsinə səbəb olan ən vacib amillərdən biri də Prezident İlham Əliyevin müxtəlif zamanlarda, fərqli kürsülərdən, o cümlədən işğaldan azad etdiyimiz ərazilərdə erməni vəhşiliyinə, vandalizminə və ağır təhqirlərinə məruz qalmış və təkcə bizə deyil, bütün İslam dünyasına aid dini abidələrin önündə səsləndirdiyi tarixi kəlamların olduğu şübhəsizdir. Prezident İlham Əliyev üzünü dəfələrlə İslam dünyasına və müsəlman dövlətlərinin başçılarına tutaraq onlara Ermənistanla və onun rəsmiləri ilə münasibətlər qurarkən işğalçıların törətdikləri vəhşilikləri və vandalizmi unutmamağı tövsiyə edib.
“Azərbaycanın döyüş meydanında əldə etdiyi qələbəsini beynəlxalq hüquq və məhkəmə müstəvisinə uğurla daşımaqda olduğu bir dönəmdə İƏT Xarici İşlər Nazirləri Şurasının (XİNŞ) 48-ci sessiyasında otuz il ərzində ərazilərimizin 20 faizini işğal altında saxlayan Ermənistanın Azərbaycana qarşı təcavüzünün nəticələri ilə bağlı siyasi, iqtisadi və mədəni məsələləri əhatə edən 4 qətnamənin qəbul olunması müharibədən sonra qazanılan növbəti uğurlardan biridir. Dörd qitəni və 57 dövləti əhatə edən İƏT Xarici İşlər Nazirləri Şurası tərəfindən qəbul olunan və 30 ilə yaxın dönəmdə Azərbaycanın məruz qaldığı təcavüzü, işğalı, terroru və müxtəlif cinayətləri özündə əks etdirən bu qətnamələrdə əvvəlki illərdə qəbul edilən müddəalara bir sıra əlavələr də olunub. Azərbaycanın haqq mübarizəsi və ərazilərinin işğaldan azad edilməsi, ərazi bütövlüyünün təmin olunması ilə nəticələnən ədalətli müharibəsi bir daha alqışlanıb və ona açıq dəstək göstərilib. Tədbir iştirakçıları erməni faşizminin etdiklərinin dünya və insanlıq üçün qəbuledilməz bir addım və heç bir halda presedentə çevrilməməli olduğunu bəyan ediblər. Azərbaycan üçün hazırkı məqamda ən vacib və önəmli amillərdən biri olan beynəlxalq hüquq müstəvisində və ayrı-ayrı məhkəmələrdə Ermənistana qarşı genişmiqyaslı təzminat iddialarının qaldırılması ilə bağlı da yekdil fikir ortaya qoyulub. Ermənistanın sülhə məcburetmə prosesinin həlledici mərhələsində, qarşı tərəfin uzun illər ərzində dövlətimizə və xalqımıza vurduğu maddi və mənəvi ziyanla bağlı beynəlxalq hüquqi proseduralara başladığımız bir məqamda bu cür mötəbər sənədlərin qəbul edilməsinə nail olmaq çox vacibdir. Bu proseslər bir daha sübut edir ki, dövlətimiz düzgün yoldadır və yürüdülən siyasət tam olaraq xalqımızın, dövlətimizin və dövlətçiliyimizin maraqlarına xidmət edir”, - deyə politoloq diqqətə çatdırıb.
Bölmənin digər xəbərləri
