Polkovnik-leytenant: Qubadlının azad olunması düşməni nokdaun etdi
Bakı, 25 oktyabr, AZƏRTAC
2020-ci il sentyabrın 27-də səhər saatlarında Ermənistanın təxribatlarına qarşı Azərbaycanın əks-hücum əməliyyatı başlandı. Azərbaycan Ordusu yüksək döyüş səviyyəsinə gətirildi. Gürcüstan sərhədindən İran sərhədinədək və Naxçıvanın Ermənistanla sərhədi boyu bütün Silahlı Qüvvələr tam hazırlıq vəziyyətinə keçdi. Qismən səfərbərlik keçirildi və daha bir ordu birliyi formalaşdırılıb tam döyüş vəziyyətinə gətirildi. Komendant saatı elan edildi. İnternet və KİV nəzarətə götürüldü və məhdudiyyətlər tətbiq edildi. Hava məkanı bağlandı. Pandemiya ilə əlaqədar bağlanmış sərhədlərdə və ölkənin daxilində ictimai və siyasi intizam daha da möhkəmləndirildi. Beynəlxalq və daxili təbliğat-təşviqat fəaliyyəti gücləndirildi. Azərbaycan Ordusu Murovdağ silsiləsindən Araz sahilinədək cəbhə boyu hücuma keçdi, eyni zamanda, üç istiqamətdən Ermənistanın Qarabağda mövqelənmiş işğalçı ordusuna zərbə endirdi. Düşmənə bir zərbə Murovdağda, digər zərbə Ağdərədə, başqa zərbə də Füzulidə endirildi.
Ehtiyatda olan polkovnik-leytenant, Heydər Əliyev adına Hərbi İnstitutun baş müəllimi, hərbi ekspert Vüqar Əliyev AZƏRTAC-a müsahibəsində Vətən müharibəsinin ilk günlərini belə xatırlayır.
“Hərbi Hava Qüvvələrinin və Quru Qoşunlarının davamlı, sürətli, gizli idarəetmə və sinxronlaşdırılmış qarşılıqlı əlaqəli döyüşləri ilə bütün istiqamətlərdə müvəffəqiyyət əldə edildi. Mükəmməl düşünülmüş hərbi hiylə ilə texniki vasitələrlə düşməni aldadaraq havadan müdafiə vasitələri aşkarlandı və sıradan çıxarıldı. Azərbaycan Hərbi Hava Qüvvələri Qarabağ səmasında havada tam hakimiyyətə sahib oldu. Ermənistanın Xankəndi ilə şimaldan quru kommunikasiya əlaqəsi olan Zod-Xankəndi avtomagistralı Azərbaycan Ordusunun atəş nəzarətinə alındı. Düşmənin cəbhə boyu keçirdiyi bütün əks-həmlələri dəf edildi. Radioelektron mübarizə və rabitə vasitələri sıradan çıxarıldı və susduruldu, komanda məntəqələri darmadağın, yüksək çinli komanda heyəti məhv edildi. Düşmənin idarəetməsi pozuldu. Canlı qüvvə və hərbi texnikada ağır itkilərə məruz qalan düşmənin müdafiə cəbhəsində çatlar əmələ gəldi. Onun uzunmüddətli döyüş üçün yaradılmış, dərin eşelonlaşdırılmış hazırlıqlı müdafiəsi hərbi vasitələrlə sındırılaraq cənubda çökdü. Silahlı Qüvvələrimiz aramsız hərbi əməliyyatlarla cəbhəni İran sərhədi ilə axan Araz çayının sahilində yardı”, - deyə hərbi ekspert bildirib.
Polkovnik-leytenant bildirib ki, düşmən Azərbaycan hakimiyyətini qorxutmaq və hakimiyyət-xalq birliyini pozmaq, iqtisadi, siyasi böhran yaratmaq, Ordumuzu dayandırmaq məqsədilə uzaqmənzilli raket-artilleriya vasitələri tətbiq etdi. Respublikanın dərinliyində, nəqliyyat kommunikasiya marşrutlarına, enerji nəqli xətlərinə, elektrik stansiyası, su anbarı və digər strateji məntəqələrə, cəbhə zonasından kənarda iri yaşayış məntəqələrində yaşayan mülki əhaliyə artilleriya zərbələri endirildi, ballistik raketlər buraxıldı. Hava Hücumundan Müdafiə Qoşunları belə zərbələrin təsirini məharətlə minimuma endirdi. Düşmənin Ermənistan və Qarabağın bütün dərinliyində yerləşən buraxılış-start qurğularını aşkarladıqca Hərbi Hava Qüvvələri belə vasitələri idarə edilən dəqiq silahlarla məhv etdi.
Azərbaycan Ordusu cənubda yarılmış keçiddən ehtiyat qüvvələrini döyüşə yeridərək şimala irəlilədi, 2020-ci il oktyabrın 4-də Cəbrayılı, sonra da oktyabrın 9-da Hadrutu azad etdi. Əlverişli hüdudda düşmənin mümkün əks-həmləsini dəf etmək üçün müdafiəyə keçib, möhkəmləndi. Düşmənin Hadrut-Araz sahili istiqamətli əks-zərbəsini dəf edib, rəqibin manevr edə biləcək mobil zirehli ehtiyatlarını darmadağın salıb, məhv etdi.
Baş müəllimin sözlərinə görə, düşmənin Zəngilan-Füzuli istiqaməti ilə cənubdan təminat kommunikasiyaları kəsildi. Düşmən qüvvələri fərarilik edib döyüş mövqelərinə çıxmaqdan imtina etdi. Döyüşə yararlı, saz silah, sursat və texnikanı mövqelərdə və anbarlarda atıb başıpozuq vəziyyətdə təşvişə düşüb qaçdı. Qərbə qaçan düşmən qüvvələrinə təşkilatlanmağa macal verməmək üçün Azərbaycan Ordusunun mobil qüvvələri cənubda, Araz çayının Azərbaycan sahili boyu düşməni təqibə başladı. Azərbaycan Ordusunun yeni yaradılmış ehtiyat qüvvəsi müvəffəqiyyəti Füzuli-Zəngilan istiqamətində inkişaf etdirmək üçün döyüşə yeridildi. Başıpozuq düşməni təqib edən Ordumuzun mobil bölmələri Araz sahili boyu təşviş içində qaçan düşmənin çiyinlərində daha da dərinliyə, Ermənistanla Azərbaycan şərti dövlət sərhədinə irəlilədi. Xudafərin körpüsünü keçdikdən sonra Azərbaycan torpaqlarında üçrəngli bayrağımız qaldırıldı.
“Azərbaycan Ordusu 2020-ci il oktyabrın 20-də Zəngilanı azad etdi. Ölkəmizin İran və Ermənistanla sərhədinə nəzarət Sərhəd Qoşunlarına tapşırıldı. Ordumuz şimala, Qubadlıya, sonra Laçına irəlilədi.
Qubadlı şəhərinin işğaldan azad olunduğunu Prezident, Silahlı Qüvvələrin Ali Baş Komandanı 2020-ci il oktyabrın 25-də özünün tviter hesabından elan etdi. “Dəmir yumruğ”un zərbəsi düşməni nokdauna saldı. Ermənistan Ordusunun, bu ölkənin Qarabağdakı bölmələri, ümumiyyətlə onun silahlı qüvvələri tükəndi və düşmən özünün müdafiə imkanlarından məhrum oldu.
Ermənistan dövlətinin daxili və xarici təşviqat mexanizmi iflasa uğradı, onun silahlı qüvvələrinin şəxsi heyətinin mənəvi-psixoloji durumu pozuldu, mübarizə əzmi qırıldı, düşmən iflic oldu”, - deyə Vüqar Əliyev vurğulayıb.
Bölmənin digər xəbərləri
