PREZİDENT İLHAM ƏLİYEV AZƏRBAYCANDA İTAR-TASS GÜNLƏRİNİN İŞTİRAKÇILARINI QƏBUL ETMİŞDİR
AZƏRTAC xəbər verir ki, Prezident İlham Əliyev yanvarın 22-də Prezident sarayında Azərbaycanda İTAR-TASS günlərinin iştirakçılarını qəbul etmişdir.
Qonaqları səmimiyyətlə salamlayan dövlətimizin başçısı İlham Əliyev Azərbaycanda İTAR-TASS günlərinin keçirilməsi ilə əlaqədar Rusiya Federasiyasının aparıcı kütləvi informasiya vasitələrinin rəhbərlərindən, elm, mədəniyyət, idman xadimlərindən və müxtəlif sahələri təmsil edən nüfuzlu şəxslərdən ibarət geniş nümayəndə heyətinin ölkəmizə səfərini mühüm hadisə kimi qiymətləndirdi. İTAR-TASS agentliyi ilə dostluq əlaqələrindən bəhs edən Prezident İlham Əliyev belə tədbirlərin ölkəmiz haqqında həqiqətlərin düzgün dərk edilərək ictimaiyyətə obyektiv şəkildə çatdırılması baxımından əhəmiyyətini vurğuladı.
Dövlətimizin başçısı Azərbaycanın müstəqillik qazandığı ilk illərdə üzləşdiyi problemlər, ümummilli liderimiz Heydər Əliyevin məqsədyönlü və yorulmaz fəaliyyəti sayəsində daxili sabitliyin bərqərar edilməsi, xarici dövlətlərlə, o cümlədən Rusiya Federasiyası ilə bərabərhüquqlu dostluq və əməkdaşlıq əlaqələrinin möhkəmləndirilməsi istiqamətində görülən işlər barədə danışdı. Respublikamızın rəhbəri dedi ki, Azərbaycan-Rusiya əməkdaşlığı bütün sahələrdə genişlənir və bu baxımdan ölkələrimiz arasında heç bir fikir ayrılığı yoxdur.
Azərbaycanda milli, dini dözümlülük baxımından vəziyyətin həmişə yüksək səviyyədə olduğunu bildirən dövlətimizin başçısı xatırlatdı ki, respublika müstəqillik qazandıqdan sonra ölkəmizdə rusdilli mətbuat daha da inkişaf etmişdir.
Daha sonra nəhəng enerji layihələrinin həyata keçirilməsindən, iqtisadi sahədə qazanılmış uğurlardan, regionların inkişafından, yeni iş yerlərinin açılması sahəsində görülən tədbirlərdən bəhs edən Prezident İlham Əliyev qonaqların diqqətini xalqımızın ən ağrılı problemi olan Ermənistan-Azərbaycan, Dağlıq Qarabağ münaqişəsinə və onun ağır nəticələrinə də yönəltdi. Dövlətimizin başçısı xüsusi vurğuladı ki, biz bu məsələni sülh yolu ilə həll etmək istəyirik. Lakin bu, mümkün olmasa, Azərbaycan öz torpaqlarını hansı yolla olursa-olsun, azad edəcəkdir.
Nümayəndə heyətinin rəhbəri, İTAR-TASS agentliyinin baş direktoru Vitali İqnatenko geniş tərkibdə heyəti qəbul etdiyinə və onlara göstərilən qonaqpərvərliyə görə Azərbaycan Prezidentinə təşəkkürünü bildirdi. O, Rusiya cəmiyyətinin müxtəlif sahələrini təmsil edən tanınmış şəxslərdən ibarət nümayəndə heyətinin Azərbaycana səfərinin ölkələrimiz arasında dostluq və əməkdaşlığın möhkəmlənməsi baxımından müstəsna əhəmiyyəti olduğunu vurğuladı.
Görüşdə çıxış edən qonaqlar - Mətbuat və Kütləvi Kommunikasiyalar üzrə Federal Agentliyin rəhbəri Mixail Seslavinski, Rusiya İdman Komitəsinin sədri Vyaçeslav Fetisov, Mətbuat və Mədəniyyət Nazirliyi Mədəniyyət departamentinin direktoru Mixail Şvıdkoy, Beynəlxalq Olimpiya Komitəsinin vitse-prezidenti, Rusiya MOK-un fəxri prezidenti Vitali Smirnov, tanınmış politoloq Gennadi Burbulis, kardioloq, akademik Renat Akçurin, “Moskovski komsomolets” qəzetinin baş redaktoru Pavel Qusev və İTAR-TASS-ın baş direktorunun birinci müavini Mixail Qusman Azərbaycanda həyatın bütün sahələrinə dair nailiyyətlərin şahidi olduqlarını məmnunluqla vurğuladılar, gələcəkdə bu uğurların daha çox olacağına əminliklərini söylədilər.
Prezident İlham Əliyev Azərbaycanla Rusiya arasında mədəni əlaqələrin inkişafında xidmətlərinə görə təltif olunmuş Mixail Qusmana “Şöhrət” ordenini təqdim etdi.
Cənab Vitali İqnatenko görüşdən xatirə olaraq Prezident İlham Əliyevə hədiyyə təqdim etdi.
Azərbaycan Prezidenti İlham Əliyev İTAR-TASS agentliyinin baş direktoru Vitali İqnatenko ilə, habelə Mixail Qusman və onun ailə üzvləri ilə xatirə şəkli çəkdirdi.
Bölmənin digər xəbərləri
