Prezident İlham Əliyevin praqmatik siyasəti Azərbaycan tarixində zəfər dolu səhifələr açdı
Bakı, 23 dekabr, AZƏRTAC
Ötən dövrlərə nəzər salsaq son illərdə ölkənin daxili, xarici siyasətində əldə olunan uğurlar nəticəsində Azərbaycanın siyasi, iqtisadi, sosial, mədəni və digər sahələrdə böyük nailiyyətlər qazanan ölkə kimi dünyada sürətli inkişaf nümunəsi göstərdiyinin şahidi oluruq. Müstəqil Azərbaycanın ucqar kəndindən tutmuş paytaxtınadək gündən-günə inkişaf etdiyini görmək üçün sadəcə ətrafımıza nəzər salmaq, ötən illərlə bir balaca müqayisə aparmaq kifayətdir.
Bunu AZƏRTAC-a açıqlamasında Milli Məclisin deputatı, Gəncə Dövlət Universitetinin Elm və innovasiyalar üzrə prorektoru Pərvin Kərimzadə deyib.
Deputat bildirib ki, dünya şöhrətli siyasi xadim, ulu öndər Heydər Əliyevin bizlərə miras qoyduğu müstəqil Azərbaycanın qələbələr, nailiyyətlərlə dolu tarixinin yeni səhifələri bu gün Prezident İlham Əliyevin milli maraqlara söykənən balanslaşdırılmış praqmatik siyasəti sayəsində yazılır.
Hələ keçən əsrin 90-cı illərdə, Azərbaycanın ağır iqtisadi böhran yaşadığı, ölkəmizi dirçəltmək üçün ümidin yalnız dənizin dibindəki neftə qaldığı vaxtlarda ulu öndər Heydər Əliyevin əsasını qoyduğu neft strategiyasının reallaşmasında o vaxt Dövlət Neft Şirkətinin vitse-prezidenti vəzifəsində işləyən İlham Əliyevin də tarixi xidmətləri olub.
Ulu Öndər çox böyük uzaqgörənliklə xarici şirkətləri Xəzər neftinin çıxarılmasına cəlb etməyə çalışırdı. Prezident İlham Əliyevin xarici dilləri, beynəlxalq hüquq məsələlərini gözəl bilməsi, əcnəbi investorları Azərbaycana yatırılan sərmayələrin hədər getməyəcəyinə inandırması bu gün ölkənin inkişafının təmin edilməsində mühüm rol oynayan “Əsrin müqaviləsi”nin imzalanmasına gətirib çıxardı. Həmin neft kontraktı Azərbaycanı inkişaf yoluna çıxardı və neft sənayesinin, bütövlükdə ölkənin sonrakı taleyində həlledici rol oynadı.
On altı il əvvəl isə xalqımız növbəti dəfə müdrik və düzgün seçim edərək, gələcək taleyini ulu öndər Heydər Əliyevin siyasi varisi İlham Əliyevə etibar etdi. Bu seçim ümummilli lider Heydər Əliyevin siyasi kursunun uğuru ilə yanaşı, onun varisinə inam və etimada əsaslanırdı.
Xalq seçimində yanılmadı. Müstəqil Azərbaycanın qurucusu, xalqımızın ümummilli lideri Heydər Əliyevin siyasi xəttini uğurla və layiqincə davam etdirən Prezident İlham Əliyev uzaqgörən siyasəti, düşünülmüş islahatları, müdrik qərarları sayəsində Azərbaycan 16 il ərzində misilsiz inkişaf yolu keçdi, beynəlxalq miqyasda mövqelərini daha da möhkəmləndirdi. Azərbaycanın ən yeni tarixinə yazılan son 16 ildə müstəqil dövlət quruculuğunun bütün istiqamətləri üzrə ciddi nailiyyətlər əldə edildi, böyük uğurlara imza atıldı, ölkədə sabitlik tam bərqərar oldu.
Ölkəmizdə dayanıqlı iqtisadi inkişafın nəticələrinin, əldə olunan iqtisadi dividendlərin, ilk növbədə, əhalinin güzəranının yüksəldilməsinə yönəldilməsi sosial müdafiə sisteminin gücləndirilməsi istiqamətində ardıcıl olaraq mühüm addımların atılmasında real ifadəsini tapdı. Uğurla həyata keçirilən sosial siyasətin mərkəzində vətəndaş rifahı dayanır. Ölkəmizin dünyada artan siyasi nüfuzu ilə yanaşı, iqtisadi reytinqi də irəlilədi. Azərbaycan dayanıqlı sosial-iqtisadi inkişafı ilə dünyada gedən rəqabətlərə tab gətirərək, sosial dövlət modelinin ixracatçısına çevrildi.
Prezident İlham Əliyev hakimiyyətə gəldiyi gündən onun siyasətinin mərkəzində Azərbaycan vətəndaşının etibarlı sosial təminatı dayanıb. Dövlətimizin başçısının 16 il əvvəl söylədiyi “Xalqa xidmət etmək mənim ən böyük vəzifəmdir, bu, mənim borcumdur” sözləri bu gün tam təsdiqini tapıb. Dövlətimizin başçısı fəaliyyətə başladığı dövrdən xalqın maraqlarını hər şeydən üstün tutan, xoşniyyətli əməlləri, imzaladığı fərman və sərəncamları, praqmatik qərarları ilə hər bir Azərbaycan vətəndaşının Prezidenti olduğunu təsdiqləyib.
Hər zaman xalqın yanında olan dövlətimizin başçısı xoş və sevincli günlərdə olduğu kimi, dar gündə də vətəndaşların kədərinə şərik çıxıb, onların əsl himayədarına çevrilib. Çətinə, dara düşən hər bir azərbaycanlı inanır ki, onun köməyinə, dəstəyinə ilk olaraq inandığı, etibar etdiyi Prezident İlham Əliyev gələcək və ona dəstək olacaq.
Xalqa müraciətində “Mənə güc verən sizin mənə olan inamınızdır” söyləməsi, məmurları daim xalqın yanında olmağa çağırması, vətəndaşların qayğıları ilə maraqlanması Prezident İlham Əliyevin xalq arasında nüfuzunu daha da yüksəldib. Bu gün dövlət qayğısını, diqqətini yaşayışında, maddi-rifah halının yaxşılaşmasında görən insanların ölkə Prezidentinə olan minnətdarlıq duyğuları ölçüyəgəlməzdir. Onlar əməlləri, Vətənə, dövlətə sadiqlikləri ilə Prezident İlham Əliyevin 2003-cü ildə səsləndirdiyi “Biz hamımız birləşərək və bir nöqtəyə vuraraq Azərbaycanı zəngin, qüdrətli dövlətə çevirəcəyik” sözlərini həyat devizinə çevirdilər. Müstəqil Azərbaycanın Prezidenti İlham Əliyevin humanist siyasətinə olan etibar, inam ölkə vətəndaşlarına daim güc və qüvvət verdi. Xalq-iqtidar birliyini daha da möhkəmləndirilməsi dövlətimizin başçısının ideyalarını reallığa çevirdi. Ulu öndər Heydər Əliyev məktəbinin ən istedadlı nümayəndəsi İlham Əliyevin düşünülmüş islahatları və müdrik qərarları sayəsində son 16 ildə qazanılan uğurlar xalqının rifahının təkcə bu gün deyil, gələcəkdə təmin olunmasına zəmanət verdi.
Bölmənin digər xəbərləri
