Prezident Kitabxanasının direktoru elmi konfransda çıxış edib
Bakı, 23 may, AZƏRTAC
Mayın 23-də “Kitabxana-informasiya texnologiyalarının inkişafında müasir tendensiyalar” mövzusunda keçirilən respublika elmi konfransında Prezident Kitabxanasının direktoru, professor Afət Abbasova çıxış edib.
Bu barədə AZƏRTAC-a kitabxanadan məlumat verilib.
Bildirilib ki, professor Afət Abbasova çıxışında Azərbaycanın zəngin kitabxana ənənələrindən bəhs edib. Vurğulayıb ki, orta əsrlərdən etibarən ölkədə formalaşan kitabxanalar təkcə bilik mənbəyi deyil, həm də cəmiyyətin mənəvi və intellektual inkişafında əvəzsiz rol oynayan mədəniyyət mərkəzləri olub. Tarix boyu bir sıra mərhələlərdən keçən Azərbaycan kitabxanaçılığı XX əsrin ikinci yarısından başlayaraq yeni inkişaf mərhələsinə qədəm qoyub.
Professor Afət Abbasova qeyd etmişdir ki, Ümummilli Lider Heydər Əliyevin rəhbərliyi ilə kitabxana işi dövlət səviyyəsində xüsusi diqqət və qayğı ilə əhatə olunub, bu sahənin modernləşdirilməsi istiqamətində mühüm addımlar atılıb. Məhz Ulu Öndərin siyasi iradəsi nəticəsində müstəqillik dövründə kitabxanaların ləğvi ilə bağlı təhlükənin qarşısı alınıb, onların qorunması və inkişafı təmin olunub. 1998-ci ildə qəbul olunmuş “Kitabxana işi haqqında” Azərbaycan Respublikasının Qanunu kitabxana sahəsində hüquqi tənzimləmənin əsasını qoyaraq, kitabxana fəaliyyətinin dövlət siyasətinə çevrilməsinə zəmin yaradıb.
Çıxışda Prezident İlham Əliyevin rəhbərliyi ilə bu istiqamətdə həyata keçirilən ardıcıl siyasətə də xüsusi yer ayrılıb. Azərbaycan Respublikası Prezidentinin 2008-ci il 6 oktyabr tarixli Sərəncamı ilə təsdiq edilmiş “Azərbaycan Respublikasında kitabxana-informasiya sahəsinin 2008–2013-cü illərdə inkişafı üzrə Dövlət Proqramı” bu baxımdan kitabxana sahəsində infrastrukturun yenilənməsi, yeni texnologiyaların tətbiqi, müasir informasiya xidmətlərinin formalaşdırılması və intellektual resurslara çıxış imkanlarının genişləndirilməsi baxımından mühüm əhəmiyyət kəsb edib.
Rəhbərlik etdiyi kitabxanasının fəaliyyəti barədə məlumat verən Afət Abbasova bildirib ki, Prezident Kitabxanasının əsası Ümummilli Lider Heydər Əliyevin 2003-cü il 23 yanvar tarixli Sərəncamı ilə qoyulub. Bu Sərəncam kitabxana işinin yeni mərhələyə keçidini və dövlət səviyyəsində informasiya siyasətinin tərkib hissəsinə çevrilməsini təmin etdi. Bu Sərəncam həm kitabxanaçılıq sistemində institusional islahatların başlanğıcı, həm də Prezident Kitabxanasının gələcək inkişafının təməli oldu.
Çıxışında professor Afət Abbasova, həmçinin vurğulayıb ki, Prezident Kitabxanasında ənənəvi kitabxana xidmətləri ilə yanaşı, müasir texnologiyalara əsaslanan innovativ xidmətlər də geniş şəkildə tətbiq olunur. Elektron resursların yaradılması, sənədlərin tam mətnlərinin rəqəmsal formada çatdırılması, onlayn axtarış sistemləri, rəqəmsal bazalara çıxış və virtual xidmət modelləri əsasında oxuculara operativ və yüksəksəviyyəli informasiya dəstəyi göstərilir. Bu yanaşma Prezident Kitabxanasının ölkədə informasiya cəmiyyətinin inkişafında mühüm rol oynayan aparıcı mərkəzlərdən birinə çevrilməsinə şərait yaradıb.
Professor Afət Abbasovanın çıxışı konfrans iştirakçıları tərəfindən böyük maraqla qarşılanıb.
Bölmənin digər xəbərləri
