Prezident seçkiləri ilə əlaqədar Azərbaycanın Qazaxıstandakı səfirliyində seçicilərin siyahısı tam tərtib edilib
Astana, 28 mart, АZƏRTAC
Aprelin 11-də Azərbaycanda keçiriləcək prezident seçkiləri ilə əlaqədar ölkəmizin Qazaxıstandakı səfirliyində seçicilərin siyahısı tam tərtib edilib. Bu ölkədəki bütün diplomatik nümayəndəliklərimizdə seçki komissiyaları yaradılıb.
Bu barədə AZƏRTAC-a məlumat verən Azərbaycanın Qazaxıstandakı səfiri Rəşad Məmmədov bildirib ki, aprelin 11-də səsvermə hüququ olan Azərbaycan vətəndaşları Astanadakı səfirlikdə, Aktaudakı baş konsulluqda, eləcə də Almatıdakı nümayəndəlikdə səs verə bilərlər. Artıq seçkilərə hazırlıq mərhələsi başa çatıb.
Səfir bildirib ki, diplomatik missiyanın əməkdaşları və onların səsvermə hüququna malik ailə üzvlərinin, həmçinin konsulluq qeydiyyatında olan müvəqqəti və daimi yaşayan Azərbaycan vətəndaşlarının seçki hüquqlarının maneəsiz həyata keçirilməsi üçün bütün lazımi şərait yaradılıb. Bu məsələdə səfirliyin kifayət qədər təcrübəsi var. Artıq diplomatik nümayəndəliklər zəruri avadanlıqla tam təchiz olunub. Azərbaycan qanunvericiliyinə uyğun olaraq səsvermə üçün bütün şərait yaradılıb.
İlahə Əhmədova
AZƏRTAC-ın xüsusi müxbiri
Astana
Bölmənin digər xəbərləri
