QAÇQIN UŞAQLARI ÜÇÜN YOXLAMA TEST İMTAHANLARI
Aprelin 20-də Xətai rayonundakı 25 nömrəli orta məktəbdə işğal olunmuş rayonlardan olan şagirdlər üçün yoxlama test imtahanları keçirilmişdir. Test imtahanlarını Tələbə Qəbulu üzrə Dövlət Komissiyası və Dövlətqaçqınkom təşkil etmiş və keçirmişlər.
Tələbə Qəbulu üzrə Dövlət Komissiyasının sədr müavini Namiq Babayev, Dövlətqaçqınkomun sədr müavini Münəvvər Əliyeva, “Abituriyent” jurnalının baş redaktoru Arzu Bağırov test imtahanları başlanmazdan əvvəl şagirdlər qarşısında çıxış etdilər. Onlar vurğuladılar ki, Azərbaycan Prezidenti Heydər Əliyev qaçqınlara və məcburi köçkünlərə daim böyük diqqət göstərir. Onların uşaqlarına qayğı dövlət qurumlarının işində öncül yer tutur. 2001-ci ildə ölkəmizin ali məktəblərinə qəbul edilənlərin 30 faizi Azərbaycanın işğal olunmuş torpaqlarından müvəqqəti köçürülmüş orta məktəblərin şagirdləri olmuşdur.
Namiq Babayev şagirdləri yeni metodik vəsaitlərlə tanış edərək, onları maraqlandıran suallara cavab verdi. Sonra 100-dən çox şagirdin iştirakı ilə yoxlama test imtahanları keçirildi. Axırda şagirdlərin hamısına “Abituriyent” jurnalının yeni nüsxələri, dərsliklər və metodik vəsaitlər paylandı.
Bölmənin digər xəbərləri
