Qadın voleybolçulardan ibarət Azərbaycan millisi Qızıl Avropa Liqasında növbəti oyununu keçirir
Bakı, 30 may, AZƏRTAC
Qadın voleybolçulardan ibarət Azərbaycan millisi Qızıl Avropa Liqasında növbəti oyununu keçirir.
AZƏRTAC xəbər verir ki, millimiz turnirin IV turunda Azərbaycan Voleybol Mərkəzində Bolqarıstan yığmasını qəbul edir. Görüşün əsas hakimi isveçrəli Kristian Volfdur. Ona həmyerlimiz Eldar Zülfüqarov kömək edir.
Qızıl Avropa Liqasında milli komandalar üç qrupda mübarizə aparırlar. “E” qrupunda yer alan Azərbaycan yığmasının rəqibləri Ukrayna, Portuqaliya və Bolqarıstan seçmələridir. Komandamız ilk görüşdə Bakıda Ukrayna yığmasını 3:1, ikinci qarşılaşmada isə Portuqaliya seçməsini eyni hesabla məğlubiyyətə uğradıb. Voleybolçularımız üçüncü turda Bolqarıstan millisinə səfərdə 1:3 hesabı ilə uduzublar.
Liqanın final mərhələsi Macarıstanda keçiriləcək.
Xatırladaq ki, Azərbaycan millisi 2016-cı ildə bu yarışın çempionu adını qazanıb.
Bölmənin digər xəbərləri
