Qanlı 20 Yanvar həqiqətləri bütün dünyaya çatdırılmalıdır
Bakı, 14 yanvar (AZƏRTAC). Yanvarın 17-də AMEA-nın Milli Tarix Muzeyi və “İRS - Naslediye” beynəlxalq jurnalının birgə təşkilatçılığı ilə “20 yanvar həqiqətlərinin xaricdə yayılması” mövzusunda tədbir keçiriləcəkdir.
Muzeydən AZƏRTAC-a bildirmişlər ki, Ümumxalq Hüzn Gününə həsr olunmuş tədbirin əsas məqsədi 20 Yanvar həqiqətlərinin dünyada yayılmasının vacibliyini geniş ictimaiyyətə, o cümlədən xaricdə yaşayan azərbaycanlılara çatdırmaq, Azərbaycan həqiqətlərinin ölkədən kənarda təbliğatının vasitə və yollarına toxunmaq, həmçinin beynəlxalq təbliğat işlərində “İRS - Naslediye” jurnalının rolunu göstərməkdir.
Tədbirdə 1990-cı ilin yanvarında totalitar sovet rejiminin xalqımıza qarşı törətdiyi qanlı cinayətlərdən bəhs olunacaq, bu faciənin Azərbaycan xalqının qəhrəmanlıq tarixində tutduğu yerdən söhbət açılacaqdır. Həmçinin Azərbaycanın müstəqillik uğrunda mübarizəsinin təbliğinin, o cümlədən 20 Yanvar həqiqətlərinin xaricdə yayılmasının vacibliyi, bu işdə mövcud olan problemlərə toxunulacaqdır.
Eyni zamanda, tədbirdə 10 ildən artıq müddətdə fəaliyyət göstərən və Azərbaycan həqiqətlərinin xaricdə yayılmasında müstəsna rol oynayan “İRS - Naslediye” beynəlxalq jurnalının bu sahədəki fəaliyyəti işıqlandırılacaqdır. Bu mövzuda videoçarx nümayiş olunacaq, faciə ilə bağlı rus, ingilis, fransız, alman, italyan, çex, yapon dillərində çap olunan jurnal nömrələri təqdim ediləcəkdir.
Bölmənin digər xəbərləri
