İDMAN
“Qarabağ” klubu “Qəbələ”nin yarımmüdafiəçisi ilə üçillik müqavilə imzalayıb
Bakı, 2 iyun, AZƏRTAC
“Qarabağ”futbol klubu 2018/2019-cu il mövsümü üçün heyətini gücləndirməyə start verib. Komanda xorvatiyalı futbolçu Filip Ozobiçi sıralarına qatıb.
AZƏRTAC kluba istinadla xəbər verir ki, 27 yaşlı yarımmüdafiəçi ilə üçillik müqavilə imzalanıb.
“Mladost” klubunun yetirməsi olan Ozobiç peşəkar karyerasına Rusiyanın “Spartak” (Moskva) klubunda başlayıb. 2012-ci ildə isə karyerasını icarə əsasında vətənində “Hayduk” (Split) klubunda davam etdirib. Bir il sonra Xorvatiyanın “Slaven” klubuna transfer olunub. Bu klubda 3 mövsüm keçirən Filip 2016-ci ildə “Qəbələ”yə keçib. Burada çıxış etdiyi 2 mövsümdə ümumilikdə 74 matçda meydana çıxıb və 25 qolla yadda qalıb.
Yeni transfer Xorvatiyanın aşağı yaş qrupları üzrə milli komandalarında forma geyinib və 3 dəfə də ölkəsinin əsas yığmasına dəvət alıb.