“Qarabağ və Şərqi Zəngəzur. Təbii ehtiyatlar atlası”nın təqdimatı keçirilib
Bakı, 23 may, AZƏRTAC
Mayın 23-də Elm və Təhsil Nazirliyinin (ETN) Geologiya və Geofizika İnstitutunda “Qarabağ və Şərqi Zəngəzur. Təbii ehtiyatlar atlası”nın təqdimat mərasimi keçirilib. Bu atlas Geologiya və Geofizika İnstitutunun (aparıcı təşkilat), Elm və Təhsil Nazirliyinin və AMEA-nın strukturuna daxil olan institutların, həmçinin Respublika Seysmoloji Xidmət Mərkəzinin əməkdaşlığı əsasında hazırlanıb.
AZƏRTAC xəbər verir ki, tədbiri nəşrin baş redaktoru, Geologiya və Geofizika İnstitutunun baş direktoru akademik Akif Əlizadə açaraq təqdimatı keçirilən atlasın geniş ictimaiyyət və mütəxəssislər üçün nəzərdə tutulduğunu bildirib. Akademik qeyd edib ki, atlasın ərsəyə gəlməsi sistemli elmi araşdırmaların nəticəsidir və ötən illər ərzində regionun coğrafiyası, təbii resursları, iqlimi və ekoloji durumu ilə bağlı yüzlərlə məlumat toplanaraq təhlil olunub.
İnstitutun baş direktoru diqqətə çatdırıb ki, Qarabağ və Şərqi Zəngəzur bölgəsi qədim tarixə malikdir və işğal dövründə tədqiqatlardan kənar qalıb, 30 il ərzində bölgənin infrastrukturu ilə yanaşı, təbiəti, ekologiyası, biomüxtəlifliyi məhv edilib. Ali Baş Komandan İlham Əliyevin rəhbərliyi ilə həyata keçirilən və tarixi Zəfərlə yekunlaşan 44 günlük Vətən müharibəsi və antiterror tədbirləri ilə Azərbaycanın ərazi bütövlüyünün və dövlət suverenliyinin tam bərpa olunduğunu deyən akademik hazırda regionun bərpası istiqamətində geniş quruculuq işlərinin həyata keçirildiyini bildirib.
Akademik Akif Əlizadə qeyd edib ki, torpaqlarımızın işğaldan azad edilməsilə regionda elmi tədqiqatlar da bərpa olunub, bölgənin geoloji və ekoloji potensialı tədqiq edilib. Bu atlas Qarabağ və Şərqi Zəngəzurda aparılan geniş quruculuq işlərinə Azərbaycan elminin, alimlərinin töhfəsidir. O vurğulayıb ki, yeni nəşr dövlətimizin başçısının qayğısı və dəstəyi, Elm və Təhsil Nazirliyinin, AMEA-nın, Ekologiya və Təbii Sərvətlər Nazirliyinin əməkdaşlarının birgə səyi nəticəsində ərsəyə gəlib.
Akademik atlasdakı xəritələrin hazırlanmasında Ekologiya və Təbii Sərvətlər Nazirliyinin Geodeziya və Kartoqrafiya Agentliyinin böyük əməyinin olduğunu bildirib. Həmçinin AMEA-nın bu prosesdə yaxından iştirak etdiyini söyləyib.
“Qarabağ və Şərqi Zəngəzur. Təbii ehtiyatlar atlası” Azərbaycan, ingilis, rus dillərində nəşri onun oxucu auditoriyasının xeyli geniş olacağına imkan yaradır. Bu baxımdan atlasın nəşri Azərbaycanın Qarabağ - Şərqi Zəngəzur bölgəsinin təbiət müxtəlifliyi haqqında etibarlı məlumata ehtiyacı olan orta və ali təhsil ocaqları, icra və bələdiyyə orqanları, elmi-tədqiqat mərkəzləri, beynəlxalq qurumlar, eləcə də digər xarici təşkilatlar üçün etibarlı vəsait kimi dəyərləndirilməlidir”, - deyə akademik Akif Əlizadə vurğulayıb.
Sonra çıxış edən AMEA-nın prezidenti akademik İsa Həbibbəyli bu nəşrin ərsəyə gəlməsinin ölkəmizin elmi mühiti üçün əlamətdar hadisə olduğunu bildirib. AMEA rəhbərinin sözlərinə görə, Qarabağın 30 illik işğalı dövründə toplanması mümkünsüz olan məlumatlar indi sistemli şəkildə toplanır, tədqiqata cəlb olunur, elmi əsasları işlənib hazırlanır.
Akademik İsa Həbibbəyli bildirib ki, torpaqlarımızın işğaldan azad olunmasından keçən müddət ərzində Ekologiya və Təbii Sərvətlər Nazirliyi və Elm və Təhsil Nazirliyi ilə birgə “Qırmızı kitab”ın 3-cü cildi hazırlanıb, həmçinin Folklor İnstitutunda “Zəngəzur folkloru antologiyası”, Dilçilik İnstitutunda “Azərbaycan dilinin Qarabağ və Şərqi Zəngəzur dialektoloji atlası”, Tarix və Etnologiya İnstitutunda “Vətən müharibəsi tarixi: Şəxsiyyət faktoru” kitabları işıq üzü görüb.
AMEA prezidenti qeyd edib ki, akademik Akif Əlizadənin rəhbərliyi ilə ərsəyə gələn atlas Aşağı Araz vadisindən Kəlbəcərə, Laçına kimi, bir sözlə bütün Qarabağ ərazisini əhatə edir və qiymətli mənbədir.
“Atlasda istifadə edilmiş xəritələr nəinki geoloji, eyni zamanda, həmin ərazilərin işğaldan azad ediləndən sonra çəkilmiş ilk coğrafi atlası kimi mühüm əhəmiyyətə malikdir. Nəşrdə tarixi və toponimik baxımından da məlumatlar təqdim edilir və olduqca zəngindir. Yeni vəsait Qarabağ və Şərqi Zəngəzurun geoloji pasportudur və elmimizin ən son mühüm nailiyyətlərindəndir”, - deyə akademik İsa Həbibbəyli diqqətə çatdırıb.
Daha sonra atlasın elmi rəhbəri və redaktoru, AMEA-nın müxbir üzvü Tələt Kəngərli yeni nəşrin geniş təqdimatını edib. Bildirib ki, bu atlas bölgənin təbii müxtəlifliyi üzrə əsas istiqamətverici sənəd kimi əvəzolunmaz elmi topludur.
Təqdimat mərasimində, həmçinin ekologiya və təbii sərvətlər nazirinin müavini Vüqar Kərimov, Geodeziya və Kartoqrafiya Agentliyinin İdarə Heyətinin sədri Nazim İsmayılov, Bakı Dövlət Universitetinin kafedra müdiri akademik Vasif Babazadə, ETN Torpaqşünaslıq və Aqrokimya İnstitutunun laboratoriya müdiri Amin İsmayılov və ETN İqtisadiyyat İnstitutunun Postkonflikt Ərazilərin Bərpası Elmi Mərkəzinin rəhbəri iqtisad üzrə fəlsəfə doktoru Azər Səfərov çıxış edərək “Qarabağ və Şərqi Zəngəzur. Təbii ehtiyatlar atlası”nın işğaldan azad edilmiş ərazilərin bərpası istiqamətində mühüm rol oynayacağını bildiriblər.
Bölmənin digər xəbərləri
