Qarabağ və Şərqi Zəngəzurdakı yenidənqurma dövlətin uzunmüddətli inkişaf strategiyasının tərkib hissəsidir - ŞƏRH
Bakı, 9 fevral, AZƏRTAC
İşğaldan azad olunmuş Qarabağ və Şərqi Zəngəzur iqtisadi rayonlarında genişmiqyaslı yenidənqurma və bərpa işləri ardıcıl şəkildə davam etdirilir. Həyata keçirilən layihələr regionun sosial-iqtisadi inkişafını təmin etməklə yanaşı, tarixi-mədəni irs nümunələrinin qorunması, memarlıq abidələrinin bərpası və müasir şəhərsalma prinsiplərinin tətbiqini də əhatə edir.
Bunu AZƏRTAC-a açıqlamasında Milli Məclisin deputatı Zaur Şükürov bildirib.
Onun sözlərinə görə, azad olunmuş ərazilərdə ilkin mərhələdə zəruri infrastrukturun yaradılması prioritet istiqamət kimi müəyyənləşdirilib.
“Müasir avtomobil yolları, beynəlxalq hava limanları, enerji və kommunikasiya xətləri inşa olunub, yaşayış məntəqələrinin yenidən qurulması istiqamətində mühüm addımlar atılıb. Füzuli, Zəngilan və Laçında tikilmiş beynəlxalq hava limanları regionun nəqliyyat-logistika imkanlarını genişləndirərək iqtisadi fəallığın artmasına əlavə stimul verir. Prezident İlham Əliyevin birbaşa iştirakı və rəhbərliyi ilə işğaldan azad edilmiş torpaqlarda sürətli bərpa-quruculuq işləri görülür. Ümumilikdə, 2020-ci ildən bəri 2026-cı ildə daxil olmaqla işğaldan azad olunmuş ərazilərin bərpasına büdcədən 25 milyard manatdan çox vəsait ayrılıb. “Ağıllı şəhər” və “ağıllı kənd” konsepsiyalarına əsaslanan layihələr regionda dayanıqlı məskunlaşma modelinin formalaşdırılmasına xidmət edir. Zəngilan rayonunun Ağalı kəndində həyata keçirilən pilot layihə müasir texnologiyaların tətbiqi, ekoloji yanaşma və ənənəvi memarlıq elementlərinin vəhdəti baxımından xüsusi əhəmiyyət daşıyır. Tarixi-mədəni irsin qorunması istiqamətində də sistemli tədbirlər həyata keçirilir. Şuşa şəhərində bir sıra tarixi və dini abidələrin bərpası davam edir. Yuxarı Gövhər Ağa və Saatlı məscidləri, Mehmandarovların malikanə kompleksi, Xurşidbanu Natəvanın evi və digər memarlıq nümunələri restavrasiya olunaraq tarixi görkəminə qaytarılır. Şəhərin tarixi-memarlıq simasının qorunması məqsədilə yeni tikililərin ümumi memarlıq üslubuna uyğun inşası təmin edilir”, - deyə Z.Şükürov əlavə edib.
Deputat vurğulayıb ki, Ağdam şəhərində də dağıdılmış tarixi irs nümunələrinin bərpası, o cümlədən Cümə məscidinin restavrasiyası, eləcə də şəhərin yeni Baş plan əsasında yenidən qurulması istiqamətində işlər davam etdirilir: “Digər rayonlarda yerləşən məscidlər, alban məbədləri, türbələr və tarix-mədəniyyət abidələrinin bərpası üzrə müvafiq layihələr icra olunur. Görülən işlər Qarabağ və Şərqi Zəngəzurun iqtisadi dirçəlişinə, turizm potensialının inkişafına, həmçinin bölgənin tarixi-mədəni irsinin qorunaraq gələcək nəsillərə ötürülməsinə xidmət edir. Regionda həyata keçirilən yenidənqurma layihələri Azərbaycan dövlətinin uzunmüddətli inkişaf strategiyasının mühüm tərkib hissəsi kimi qiymətləndirilir”.
Bölmənin digər xəbərləri
