Qarabağda yaradılan istehsal sahələri ölkəmizin iqtisadiyyatında əhəmiyyətli yer tutacaq ŞƏRH
Bakı, 24 sentyabr, AZƏRTAC
Prezident İlham Əliyev Azərbaycan Respublikasının VII çağırış Milli Məclisinin ilk iclasında parlamentlə hökumətin birgə fəaliyyətinin istiqamətlərini müəyyənləşdirdi. Dövlətimizin başçısının qeyd etdiyi vəzifələr çoxşaxəlidir və ölkəmizin güclənməsinə, inkişafına, beynəlxalq mövqelərinin möhkəmlənməsinə xidmət edəcək. Belə ki, həmin vəzifələrin arasında iqtisadi inkişafla bağlı səsləndirilən fikirlər digər məsələlərin həyata keçirilməsi üçün çox əhəmiyyətlidir.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
Prezident İlham Əliyevin rəhbərliyi ilə Azərbaycanın böyük inkişaf yolu keçdiyini deyən deputat bildirib: “Cari ilin 8 ayında ölkəmizin iqtisadiyyatı 4 faizdən çox artıb. Xarici dövlət borcumuz ÜDM-in cəmi 7,5 faizini təşkil edir. Bu gün dövlət borcumuzu qısa zaman kəsiyində bağlaya bilmək imkanına malik olmuşuq. Halbuki, dünyanın inkişaf etmiş ölkələrinin xarici dövlət borcları ÜDM-in 100 faizi və ya daha çoxdur. Dövlətimizin xarici borclanmaya getməməsi ölkəmizdə aparılan iqtisadi siyasətin uğurudur. Əhalinin rifahının yaxşılaşdırılması istiqamətində görülən işlərin göstəricisidir ki, son 5 ildə minimum əməkhaqqı 2,7 dəfə, minimum pensiya 2,5 dəfə artıb. 2018-ci ildən bu günə kimi ölkəmizdə 7 milyard manat maliyyə tutumlu 4 milyon insanı əhatə edən dörd sosial paket icra olunub. Qarşıdan gələn dövrdə də minimum əməkhaqqının və minimum pensiya məbləğinin artırılması nəzərdə tutulur.
Dövlətimizin iqtisadi baxımdan heç kimdən asılı olmamağı siyasi müstəqilliyimizi də təmin edib. Belə ki, müharibənin başa çatmasından keçən dövr ərzində ərazilərin yenidən qurulması və bərpası qarşımızda dayanan əsas vəzifələrdəndir. İşğaldan azad olunmuş ərazilərimizin yenidən qurulması üçün cari ilin sonuna qədər dövlət büdcəsindən ayrılan vəsait 19 milyard manat olacaq. Ermənilərin 30 ildə məhv edərək viran qoyduqları şəhər və kəndləri heç bir xarici kömək olmadan öz gücümüzlə yenidən qurub bərpa edirik. Xüsusilə vurğulamalıyıq ki, işğaldan azad olunmuş ərazilərimizin yenidən bərpasında təkcə Özbəkistanın və Qazaxıstanın Füzulidə inşa etdikləri məktəb və yaradıcılıq mərkəzi, Qırğızıstanın Ağdamda tikməyə davam etdiyi orta məktəb istisna olmaqla heç bir dövlət və ya beynəlxalq təşkilat ölkəmizə maddi dəstək göstərməyib. Amma dünya təcrübəsində müharibədən sonra dağıdılmış yaşayış məntəqələrin yenidən qurulması və bərpasına beynəlxalq təşkilatlar qrantlar ayırır və maliyyə dəstəyi göstərirlər. Bu məsələ Azərbaycana çatanda isə hamı susur. Hətta işğala məruz qalan ərazilərimizin viran qoyulmasına baxmayaraq, bizi günahkar çıxartmağa çalışırlar. Bu da bəzi qərb ölkələrində ikili standartların, islamofobiya və anti-Azərbaycan fikirlərinin dərinləşməsinin göstəricisi hesab oluna bilər”.
Deputat qeyd edib ki, işğaldan azad olunmuş ərazilərdə iqtisadi imkanlarımız sayəsində qısa zaman kəsiyində meqa layihələr icra olunub və tikinti işləri davam etməkdədir. Belə ki, son 3,5 ildə Şərqi Zəngəzur və Qarabağ iqtisadi rayonlarında 3 min kilometrdən çox avtomobil yolları, 2 beynəlxalq hava limanı tikilərək istifadəyə verilib. Həm də dəmir yolları, 70 kilometr uzunluğunda 45 tunel və 450 körpü tikilməkdədir. Çaylar üzərində yenidən qurularaq bərpa olunan kiçik su elektrik stansiyalarının generasiya gücü 270 meqavata çatıb. Mərhələli şəkildə tikintisi başa çatan bir neçə şəhər və kəndə 8 mindən çox keçmiş məcburi köçkün qaytarılıb. İlin sonuna qədər işğaldan azad olunmuş ərazilərə qayıdacaq keçmiş məcburi köçkünlərin sayı 20 min nəfəri keçəcək.
“İqtisadi gücümüzün artırılması istiqamətində islahatlar olmalıdır ki, növbəti illərdə də nəzərdə tutulmuş proqramlar davamlı icra olunsun. Ona görə də həm işğaldan azad olunmuş ərazilərdə, həm də ölkəmizin digər regionlarında yeni müəssisələr istifadəyə verilir. Məsələn, Prezident İlham Əliyevin Qarabağa etdiyi son səfəri zamanı Ağdam Sənaye Parkında 6 böyük müəssisənin açılış olub. Bu müəssisələrdə öz doğma yurdlarına qayıdacaq insanlar üçün 400 daimi iş yeri yaradılıb. O cümlədən Ağdam Sənaye Parkında qeydə alınmış rezidentlərin icra etdiyi bütün layihələrin başa çatmasından sonra 2 mindən çox daimi iş yerləri açılacaq. Həmçinin Kəlbəcərdə “İstisu” Müalicə-İstirahət Kompleksi istifadəyə verilib. Aqroparkın və digər istehsal sahələrinin inşası davam etməkdədir. Ümumiyyətlə, işğaldan azad olunmuş ərazilərdə yaradılan istehsal sahələri gələcəkdə ölkəmizin iqtisadiyyatında əhəmiyyətli yer tutacaq.
Dövlətimizin başçısının müəyyən etdiyi vəzifələrdən biri də hərbi sənaye kompleksinin yaradılmasıdır ki, bu da ölkəmizin hərbi gücünün artmasına, məhsulların idxalından asılılığımızın azalmasına və ixrac potensialının artmasına xidmət edəcək. Bu gün Azərbaycan ondan çox ölkəyə hərbi sənaye məhsullarını ixrac edir. Qəbul olunmuş qanunvericiliyə əsasən hərbi sənayesi sahəsində özəl-dövlət müştərək istehsal sahələrinin yaradılması imkanları nəzərdə tutulub. Məhz belə yeni iqtisadi modelin hərbi sənaye kompleksinin inkişafına tətbiq olunması çoxçeşidli istehsala və ixracın diversifikasiyasına yol açacaq”, - deyə A.Badamov vurğulayıb.
Bölmənin digər xəbərləri
