Qarabağsız, Ağdamsız Azərbaycan yaşaya bilməz
İsmayıllı, 23 iyul, AZƏRTAC
İsmayıllı Regional Mədəniyyət İdarəsinin tabeliyində fəaliyyət göstərən mədəniyyət müəssisələri Ağdamın işğalının 27-ci ildönümü ilə əlaqədar onlayn videoçarxlar hazırlayıblar. Regional mədəniyyət idarəsinin mətbuat katibi Aysu Nəcəfli AZƏRTAC-ın bölgə müxbirinə bildirib ki, İsmayıllı rayon Fazil Əzimov adına Uşaq Musiqi Məktəbi, rayon mərkəzi kitabxanası, Şamaxı MKS-nin Uşaq şöbəsi, Qəbələ Tarix-Diyarşünaslıq Muzeyi, Ağsu rayon Mədəniyyət Mərkəzi, Şamaxı rayon Mirzə Ələkbər Sabirin ev-muzeyi və digər mədəniyyət müəssisələrinin əməkdaşlarının hazırladıqları videoçarxlar qədim Ağdam torpağının xain düşmən tərəfindən talan olunması, milli və mənəvi sərvətlərinin məhv edilməsi, o cümlədən bu döyüşlərdə qəhrəmancasına həlak olan mərd vətən övladları haqqında geniş məlumatlardan ibarət olub, yaşadığımız o ağrılı-acılı günləri bir daha göz önündə canlandırır. Videoçarxlarda 27 il əvvəl, iyulun 23-də işğal olunmuş Ağdamın erməni qəsbkarlarından azad olunacağı günün heç də uzaqda olmadığına inam ifadə olunub. Axı ümummilli lider Heydər Əliyevin söylədiyi “Qarabağsız, Ağdamsız Azərbaycan yaşaya bilməz” fikri aktual olaraq qalmaqdadır.
Bölmənin digər xəbərləri
