Qaradağ rayonunda 20 Yanvar faciəsinin ildönümü ilə bağlı ümumrayon anma mərasimi keçirilmişdir
Bakı, 17 yanvar (AZƏRTAC). Yanvarın 17-də Lökbatan qəsəbəsindəki Ə.Əmirov adına mədəniyyət sarayında 20 Yanvar faciəsi qurbanlarının xatirəsinə həsr olunmuş ümumrayon anma mərasimi keçirilmişdir.
AZƏRTAC xəbər verir ki, mərasimdə Qaradağ Rayon İcra Hakimiyyətinin (RİH) başçısı Süleyman Mikayılov, şura üzvləri, idarə, müəssisə və təşkilat rəhbərləri, rayon ictimaiyyətinin nümayəndələri iştirak etmişlər.
Əvvəlcə 20 Yanvar faciəsi qurbanlarının xatirəsi bir dəqiqəlik sükutla yad edilmiş, qanlı hadisələrdən bəhs edən sənədli film nümayiş olunmuşdur.
Tədbir ədəbi-bədii kompozisiya ilə davam etmişdir.
Həmin gün qəsəbədə yaşayan 20 Yanvar faciəsi əlilləri ilə görüş də keçirilmişdir.
Görüşdə RİH rəhbərliyi Qanlı Yanvarın xalqımızın qürur mənbəyi olduğunu vurğulamışdır. Bildirilmişdir ki, faciəyə kəskin etiraz olaraq 1990-cı il yanvarın 21-də ümummilli lider Heydər Əliyev Azərbaycanın Moskvadakı daimi nümayəndəliyinə gələrək bu hadisənin xalqımıza qarşı yönəldilmiş repressiya olduğunu bütün dünyaya elan etmişdir. Ulu öndər Heydər Əliyevin bu fakta hüquqi-siyasi qiymət vermiş yeganə siyasətçi olduğu, 20 Yanvar faciəsi qurbanlarının xatirəsinin hər il yüksək səviyyədə anıldığı, Azərbaycan Prezidenti İlham Əliyev tərəfindən Qanlı Yanvar şəhidlərinin ailələrinə və əlillərinə daim diqqət və qayğı göstərildiyi xüsusi qeyd edilmişdir.
Sonda Qaradağ rayonunun ərazisində yaşayan bir 20 Yanvar şəhidi ailəsinə və on üç əlilə yardım təqdim olunmuşdur.
Bölmənin digər xəbərləri
