QARŞILIQLI FƏALİYYƏT GÜCLƏNDİRİLİR
Təbii və texnogen xarakterli fövqəladə hallara dair Dövlətlərarası Şuranın növbəti iclası iyunun 27-də Düşənbədə işə başlamışdır.
MDB İcraiyyə Komitəsinin mətbuat xidmətindən AZƏRTAC-a bildirmişlər ki, iclasın gündəliyinə 20-dən çox məsələ daxildir. İclasda təbii və texnogen xarakterli fövqəladə halların nəticələrini aradan qaldırmaq üçün yaradılmış MDB Qüvvələri Korpusunun 2010-cu ilədək dövlətlərarası məqsədli inkişaf proqramının həyata keçirilməsinin gedişi müzakirə olunacaqdır. Mülki müdafiə və fövqəladə hallar problemləri üzrə Ümummrusiya Elmi Təqdiqat İnstitutuna MDB ölkələrinin elm və yüksək texnologiyalar sahəsində baza təşkilatı statusunun verilməsi barədə hökumət başçıları şurasının qərar layihəsi, regionlararası və sərhədyanı əməkdaşlıq konsepsiyasının yerinə yetirilməsi, Birliyin Qüvvələr Korpusunun daimi fəaliyyət göstərən idarəetmə orqanının yaradılmasına dair təkliflər nəzərdən keçiriləcəkdir.
Bundan əlavə, Birlik ölkələrinin təbii və texnogen xarakterli fövqəladə hallar haqqında bir-birini xəbərdar etməsinə nəzarəti yoxlamaq üçün plan-cədvəli, Şuranın 2009-cu il üçün əsas tədbirlər planını və digər məsələləri müzakirə etmək nəzərdə tutulmuşdur.
İclas çərçivəsində su ilə əlaqədar təbii fəlakətlərin qarşısının alınması mövzusunda beynəlxalq konfrans keçiriləcəkdir.
Təbii və texnogen xarakterli fövqəladə hallar üzrə Dövlətlərarası Şura 1993-cü ildə yaradılmışdır. MDB-də baş verən bütün təbii proseslərə operativ münasibət bildirən şura fövqəladə halların qarşısının alınması və nəticələrinin aradan qaldırılmasına dair məsələlərin həllində qarşılıqlı fəaliyyətin və əməkdaşlığın bütün tərəflər üçün məqbul formalarının tapılmasına kömək edir.
Bölmənin digər xəbərləri
