Qazaxıstan neftinin BTC kəməri ilə nəqlinin artırılması üzrə dördaylıq sınaq prosesi aparılır
Astana, 6 may, AZƏRTAC
Bakı-Tbilisi-Ceyhan boru kəmərinin illik ötürmə qabiliyyəti 50 milyon tondur. Hazırkı müqaviləyə əsasən, Qazaxıstan bu marşrutla ildə 1,5 milyon ton xam neft ixrac edə bilər.
AZƏRTAC “Kazinform”a istinadla xəbər verir ki, bunu Qazaxıstan Respublikası Energetika Nazirliyinin Neftin nəqli və emalı şöbəsinin baş eksperti Sultanbek Saduaxasov deyib. O əlavə edib: “Azərbaycan bu həcmin 2,2 milyon tona çatdırılmasında maraqlı olduğunu bildirib. Biz bu istiqamətdə hər iki tərəfin uyğun dövlət qurumları ilə işləyirik”.
Hazırda Azərbaycan ilə Qazaxıstan arasında 4 ay davam edəcək razılaşmanın sınaq prosesi gedir. Ekspert qrupu Qazaxıstandan tədarük olunan “qara qızıl”ın həcmini tədricən artırmaq və bazarın bunu necə qəbul etdiyini müşahidə etmək niyyətindədir.
“Kaşaqan” MMC baş direktorunun kommersiya məsələləri üzrə müavini Kuanış Keskinbayev bildirib ki, Qazaxıstan neftinin tərkibində kükürd və merkaptan var. O qeyd edib: “Azərbaycan neftinin tərkibində ümumiyyətlə merkaptan yoxdur, kükürd isə çox azdır. Qazaxıstandan gətirilən neft Azərbaycan məhsullarının keyfiyyətinə və qiymətinə mənfi təsir göstərəcəkmi? Bunun üçün sınaq müddəti müəyyən edilib. Bundan sonra biz müqaviləyə uyğun olaraq Qazaxıstan neftinin həcmini mərhələli şəkildə artıracağıq”.
Onun sözlərinə görə, sınaq müddəti gözlənildiyi kimi keçərsə, 2025-ci ildə bu marşrutla neft ixracının həcmi 1,75 milyon tona çatdırıla bilər. Gələn il isə həcmin 2 milyon tona çatdırılması nəzərdə tutulur.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
