QAZAXISTAN PREZİDENTİ NURSULTAN NAZARBAYEVİN “BÖHRANLI ONİLLİK” KİTABININ TƏQDİMATI OLMUŞDUR
AZƏRTAC-ın müxbiri xəbər verir ki, Qazaxıstanın Bakıdakı səfirliyinin təşəbbüsü ilə həmin kitab Azərbaycan-Qazaxıstan Dostluq Cəmiyyəti tərəfindən Azərbaycan dilinə tərcümə edilmiş və “Əbilov, Zeynalov və oğulları” nəşriyyatı tərəfindən nəfis şəkildə çap edilmişdir.
Mərasimi Qazaxıstanın Bakıdakı səfiri Andar Şukputov açaraq bildirdi ki, Prezident Nursultan Nazarbayevin bu kitabında müasir dövrün çox ciddi, hamını düşündürən, həyati əhəmiyyət daşıyan problemlərindən söhbət açılır.
Təqdimat mərasimində Baş nazirin birinci müavini Abbas Abbasov, Azərbaycan Yazıçılar Birliyinin katibi, Azərbaycan-Qazaxıstan Dostluq Cəmiyyətinin vitse-prezidenti Çingiz Abdullayev, Dövlət Neft Şirkətinin prezidenti Natiq Əliyev, Prezident Administrasiyası ictimai-siyasi şöbəsinin müdiri Əli Həsənov, Azərbaycan Prezidenti Yanında İdarəetmə Akademiyasının rektoru Seyfəddin Qəndilov, Azərbaycan-Qazaxıstan Dostluq Cəmiyyətinin prezidenti Eldar Günaydın çıxış edərək türk dünyasının görkəmli siyasi xadimlərindən və dövlət başçılarından biri olan Nursultan Nazarbayevin “Böhranlı onillik” kitabında hazırkı dövrdə bəşəriyyəti narahat edən çox ciddi məsələlərə toxunulduğunu bildirdilər. Natiqlər qeyd etdilər ki, kitabda XXI əsrin birinci onilliyinin yeni reallıqları ətraflı təhlil edilir, terrorizm, separatizm və ekstremizmin regional və qlobal təhlükəsizlik üçün ən böyük maneə olduğu bildirilir. Müəllif yaşadığımız əsrdə getdikcə sürətlənən qloballaşma prosesinin xalqların milli-mənəvi dəyərlərinə mənfi təsir göstərəcəyini inkar etmir. Müəllif kitabda Yer kürəsində yoxsulluq və dilənçilik, psixotrop maddələrin istehsalı, dini davakarlıq və dözümsüzlük, millətçilik kimi məsələlərə toxunur, bu halların ağır nəticələrə gətirib çıxardığını göstərir. Kitabda, həmçinin ABŞ-da baş vermiş 11 sentyabr faciəli hadisələrindən sonra dünyada müasir terrorizmə qarşı mübarizənin gücləndiyi bildirilir.
“Böhranlı onillik” kitabında, həmçinin Xəzərin hüquqi statusuna toxunulur, bu regionda təhlükəsizlik zonaları yaradılmasının vacibliyi vurğulanır, “Xəzər sabitlik paktı” üzərində düşünməyin əhəmiyyəti diqqətə çarpdırılır.
Mərasim başa çatdıqdan sonra Azərbaycan-Qazaxıstan Dostluq Cəmiyyətinin prezidenti Eldar Günaydın bildirdi ki, Azərbaycan Dövlət Neft Şirkətinin prezidenti Natiq Əliyev “Dədə Qorqud” Beynəlxalq sülh mükafatına layiq görülmüşdür. O həmin mükafatı sahibinə təqdim etdi. Qeyd olundu ki, ümummilli liderimiz Heydər Əliyev və Qazaxıstan Prezidenti Nursultan Nazarbayev həmin mükafatın ilk laureatlarıdır.
Mərasimdə Milli Məclis sədrinin birinci müavini Arif Rəhimzadə iştirak edirdi.
Bölmənin digər xəbərləri
