Qazaxıstandan neft tədarükünün dayandırılması Rumıniyada yanacaq böhranı riski yaradıb
Buxarest, 23 iyul, AZƏRTAC
Rumıniyanın milli xəbər agentliyi “AGERPRES” xəbər verir ki, Qazaxıstandan xam neft tədarükünün dayandırılması ölkədə yanacaq bazarında ciddi problemlər yarada bilər.
AZƏRTAC xəbər verir ki, bu barədə iqtisadi ekspert Adrian Neqresku bildirib.
Ekspertin sözlərinə görə, Rumıniyanın idxal etdiyi xam neftin təxminən 63 faizi Qazaxıstanın payına düşür. Xəzər Boru Kəməri Konsorsiumu (CPC) vasitəsilə Novorossiysk terminalına neft nəqlinin dayandırılması Rumıniyanın yanacaq təminatına və bazardakı qiymətlərə birbaşa təsir göstərə bilər.
Adrian Neqresku qeyd edib ki, CPC sistemi Qazaxıstanın əsas neft ixrac marşrutudur. Təxminən 1500 kilometr uzunluğunda olan boru kəməri Qərbi Qazaxıstan yataqlarını Rusiyanın Novorossiysk limanı ilə birləşdirir və ölkənin ixrac etdiyi neftin böyük hissəsi bu marşrut vasitəsilə dünya bazarına çıxarılır.
Ekspert vurğulayıb ki, Rumıniyanın Petromidia və Petrobrazi neft emalı zavodları əsasən Qazaxıstan nefti ilə işləyir. Buna görə də tədarükün uzun müddət dayanması emal müəssisələrinin fəaliyyətinə, yanacaq bazarında təklifin azalmasına və benzinlə dizel yanacağının qiymətlərinin artmasına səbəb ola bilər.
A.Neqreskunun fikrincə, vəziyyət qısa müddətdə həll edilməzsə, Rumıniya alternativ xam neft mənbələrinin cəlb olunması istiqamətində təcili tədbirlər görməli olacaq. O hesab edir ki, enerji təhlükəsizliyinin təmin edilməsi hazırkı şəraitdə ölkənin əsas prioritetlərindən biri olmalıdır.
Bölmənin digər xəbərləri
