QAZAXLILAR ÖTƏN İLİ UĞURLU SAYIRLAR
AZƏRTAC-ın müxbiri xəbər verir ki, fevralın 15-də Qazax Rayon İcra Hakimiyyətinin 2006-cı ilin yekunlarına və qarşıda duran vəzifələrə həsr olunmuş geniş şura iclası keçirilmişdir.
İclas iştirakşıları əvvəlcə ulu öndər Heydər Əliyevin abidəsi önünə əklil, gül-çiçək dəstələri qoymuş, xatirəsini ehtiramla yad etmişlər.
Qazax Rayon İcra Hakimiyyətinin başçısı Rauf Hüseynov hesabat məruzəsi ilə çıxış etmiş, regionların sosial-iqtisadi inkişafı Dövlət Proqramına qazaxlıların əməli cavabından söz açaraq bildirmişdir ki, ötən il işsizliyin aradan qaldırılması üçün ciddi tədbirlər görülmüş, 1097 yeni iş yeri açılmışdır. Sahibkarlığa qayğı göstərilməsi sayəsində məhsul istehsalı xeyli artmışdır. Belə ki, rayonda ümumi məhsul istehsalının həcmi 46 milyon 405 min manat olmuşdur. Bu, 2005-ci illə müqayisədə 11,4 faiz çoxdur. Rayonda azad sahibkarlığı daha da inkişaf etdirmək üçün 42 sahibkara 532 milyon 7 min manat kredit verilmişdir.
Məruzəçi tikinti-abadlıq işlərindən bəhs edərək demişdir ki, hesabat dövründə şəhərin yollarına 1400 kvadratmetr asfalt döşənmiş, 20 kilometr kəndarası yollar əsaslı təmir edilmişdir. Bunlarla yanaşı, Olimpiya İdman Kompleksi, Müalicə-Diaqnostika Mərkəzi, 16 və 24 mənzilli yaşayış binaları, rayonun Dəmirçilər və Fərəhli kəndlərində müvafiq olaraq 200 və 100 şagird yeri olan məktəb binaları, İkinci Şıxlı kəndində Xram çayı üzərində 204 metrlik körpü tikilir.
Məruzədə səhiyyə, təhsil, mədəniyyət, nəqliyyat, rabitə və digər sahələrdəki uğurlardan da söhbət açılmış, nöqsanları aradan qaldırmaq yolları göstərilmişdir.
İclasda respublikanın baş prokuroru Zakir Qaralov çıxış etmişdir.
Yığıncaq iştirakçıları adından Prezident İlham Əliyevə müraciət qəbul olunmuşdur.
Bölmənin digər xəbərləri
