Qəbələ Arxeoloji Mərkəzində Ulu Öndərin xatirəsi anılıb
Qəbələ, 12 dekabr, Mustafa Dadaşov, AZƏRTAC
Bütün həyatını və fəaliyyətini öz xalqının xoşbəxtliyinə həsr etmiş ümummilli lider Heydər Əliyev Azərbaycanın inkişafı və tərəqqisi naminə misilsiz xidmətlər göstərib. Ulu öndər Heydər Əliyevi digər şəxslərdən fərqləndirən başlıca cəhət onun doğma Vətəninə, xalqına bağlılığı idi. Xalqın ən gözəl keyfiyyətlərini özündə cəmləşdirən bu tarixi şəxsiyyət dövlətinə, millətinə bağlılığı ilə Ümummilli Lider səviyyəsinə yüksəlib.
AZƏRTAC-ın bölgə müxbiri xəbər verir ki, bu fikirlər Ulu Öndərin anım günü ilə əlaqədar Qəbələ Dövlət Tarix-Bədii Qoruğu və Azərbaycan Milli Elmlər Akademiyasının (AMEA) akademik Həsən Əliyev adına Coğrafiya İnstitutunun birgə təşkilatçılığı ilə Qəbələ Arxeoloji Mərkəzində keçirilən tədbirdə səsləndirilib.
Toplantının əvvəlində dahi rəhbərin xatirəsi bir dəqiqəlik sükutla yad edilib.
Tədbirdə İnstitutun baş direktoru, coğrafiya elmləri doktoru Zakir Eminov çıxış edərək, Ulu Öndərin Azərbaycanda elm və təhsilin inkişafındakı xidmətlərindən söz açıb. Bildirilib ki, görkəmli dövlət xadiminin fəaliyyəti dövründə tək amalı ölkənin inkişafı və vətəndaşların rifahını təmin etmək olub. Dahi şəxsiyyətin müdrikliyi, zəngin siyasi, dövlətçilik təcrübəsi, sarsılmaz qətiyyəti sayəsində bu gün Azərbaycan dünyanın qabaqcıl ölkələri sırasında yer almaqdadır.
Tədbirdə çıxış edən Qəbələ Dövlət Tarix-Bədii Qoruğunun direktoru Zahir Kərimov bildirib ki, Azərbaycan və dünya tarixini incəliklərinə qədər bilən Heydər Əliyev ömrünün bütün anlarında tarix elminin inkişafına xüsusi diqqət yetirirdi. Ulu Öndər ölkənin hər bir vətəndaşının elm sahəsinə mükəmməl yiyələnməsini vacib şərt sayırdı və ona görə də bütün çıxışlarında, nitqlərində bu məsələlərə xüsusi diqqət yetirirdi.
Tədbirdə çıxış edən Coğrafiya İnstitutunun əməkdaşlarından Zaur İmrani, Mirnuh İsmayılov, Müseyib Yunusov, Habil Haqverdiyev, Yelena Tağıyeva, İsmayıl Quliyev , Ənvər Əliyev, Əmir Əliyev, Solmaz Rzayeva, Etibat Bədəlov, Sima Əliyeva və Həsən Nəbiyev ulu öndər Heydər Əliyevin respublikamıza rəhbərliyinin ilk günlərdən etibarən elmin inkişaf etdirilməsi ilə bağlı məsələlərə xüsusi diqqət yetirdiyini, ölkəmizdə elmin sürətli inkişafı üçün mühüm qərarlar qəbul olunduğunu bildiriblər.
Çıxışlardan sonra tədbir iştirakçıları “Dahi Şəxsiyyət” sənədli filminə baxıblar.
Tədbirdən sonra Qəbələ Dövlət Tarix Bədii Qoruğunun və AMEA Coğrafiya İnstitutu əməkdaşlarının iştirakı ilə Qəbələ Arxeoloji Mərkəzinin həyətində Ulu Öndərin anım gününə həsr olunmuş ağacəkmə aksiyası keçirilib.
Bölmənin digər xəbərləri
