Qəbələdə pandemiyaya qarşı mübarizə ilə əlaqədar görülən işlər müzakirə olunub
Qəbələ, 15 aprel, Mustafa Dadaşov, AZƏRTAC
Koronavirus (COVID-19) pandemiyasına qarşı mübarizə tədbirləri ilə əlaqədar Nazirlər Kabineti yanında Operativ Qərargahın tələb və tövsiyələrinin yerinə yetirilməsi məqsədilə Qəbələ rayonunda əhali arasında müntəzəm olaraq geniş maarifləndirmə işləri aparılır, aidiyyəti qurumlar tərəfindən xüsusi karantin rejimi qaydalarının təmin olunmasına ciddi nəzarət edilir.
AZƏRTAC-ın bölgə müxbiri xəbər verir ki, bu barədə koronavirus pandemiyasına qarşı aparılan mübarizə tədbirləri ilə əlaqədar aprelin 15-də Qəbələ Rayon İcra Hakimiyyətinin başçısı Səbuhi Abdullayevin iştirakı ilə keçirilən videokonfransda məlumat verilib.
Rayonun hüquq-mühafizə orqanlarının və aidiyyəti təşkilatların rəhbərlərinin, inzibati ərazi dairələri üzrə nümayəndələrin iştirak etdiyi videokonfransda Prezident İlham Əliyevin rəhbərliyi ilə Azərbaycan hökuməti tərəfindən koronavirus pandemiyasına qarşı mübarizə məqsədilə ölkədə həyata keçirilən qabaqlayıcı tədbirlər barədə ətraflı məlumat verilib, bu istiqamətdə Qəbələ rayonunda görülmüş işlər geniş təhlil edilib.
Səbuhi Abdullayev bildirib ki, infeksiyanın yayılmasının qarşısının alınması məqsədilə rayonun yaşayış məntəqələrində, həmçinin Qəbələ şəhərinin prospekt və küçələrində, səkilərdə, park və xiyabanlarda, çoxmənzilli yaşayış binalarının həyətlərində mütəmadi olaraq dezinfeksiya işləri aparılır, sanitar-gigiyenik vəziyyət daim nəzarətdə saxlanılır. Rayon icra hakimiyyətinin könüllüləri, yerli icra orqanlarının və bələdiyyələrin nümayəndələri yaşı 65-dən yuxarı olan kimsəsiz insanların problemlərinin həllinə xüsusi həssaslıqla yanaşırlar. Rayonda yaşayan imkansız ailələrin siyahısı dəqiqləşdirilərək, onlara zəruri ərzaq yardımları göstərilir.
Bildirilib ki, hazırda kənd təsərrüfatı sahəsində işlərin qızğın dövrü olduğuna görə, Nazirlər Kabineti yanında Operativ Qərargahın tövsiyə və tələblərinə uyğun olaraq, torpaq mülkiyyətçilərinə yaz-tarla işləri ilə məşğul olmaq üçün əlverişli şərait yaradılmalıdır. Çətinliklər yarandıqda, bu barədə rayon icra hakimiyyətində yaradılmış xüsusi qərargaha məlumat verilməlidir.
Diqqətə çatdırılıb ki, respublikamızın bu çətin sınaqdan tezliklə və az itkilərlə çıxması üçün ölkə rəhbərliyi tərəfindən qətiyyətli addımlar atılır.
Sonra videokonfransda inzibati ərazi dairələri üzrə nümayəndələrin yaşayış məntəqələrində karantin rejimi ilə əlaqədar görülən işlər barədə məlumatları dinlənilib.
Aidiyyəti təşkilatların rəhbərləri koronavirus infeksiyasının yayılmasının qarşısının alınması və sosial təcridin nəzarətdə saxlanılması məqsədilə karantin dövründə üzərlərinə düşən vəzifələrin yerinə yetirilməsi istiqamətində səylərini daha da artıracaqlarını bildiriblər.
Bölmənin digər xəbərləri
